Lipesalema 52 - Setswana 1970

Go latlhega loleme lwa tsietso

¹ Sefela sa thuto sa ga Dafita se se kwaletsweng moopedisi,

² jale fa Doege wa Moetomo a tla go Saule, a mmolelela a re: “Dafita o tsenye mo ntlong ya ga Ahimelege.”

³ O ipokelang ka bosula, seganka ke wena? Bopelotlhomogi jwa Modimo bo nnetse ruri.

⁴ Motsietsi ke wena, loleme lwa gago lo loga maano a tshenyo, jaaka logare lo lo looditsweng.

⁵ O rata bosula bogolo go molemo; o rata maaka bogolo go boammaaruri. Sela.

⁶ O kgatlhwa fela ke mafoko a a senyang, loleme lwa tsietso ke wena.

⁷ Ka moo, Modimo o tla go digela ruri, o go tshwara, o go swatola mo tenteng ya gago; o tla go kumola ka medi mo lefatsheng la baphedi. Sela.

⁸ Basiami ba tla bona, ba boifa; mme ba tla mo tshega ba re:

⁹ “Bonang, monna su, yo o sa dirang Modimo botshabelo jwa gagwe, mme o ikantse bogolo jwa khumo ya gagwe, a ithatafatsa ka bopelotshetlha jwa gagwe.”

¹⁰ Mme nna ke tshwana le motlhware o motalatala mo Ntlong ya Modimo. Ke ikantse bopelotlhomogi jwa Modimo ka gale le ka bosakhutleng.

¹¹ Ke tla go baka ka gale, ka o dirile jalo; ke tla lebelela leina la gago; gonne le molemo fa pele ga barategi ba gago.