Lipesalema 51 - Setswana 1970

Thapelo ya boikwatlhao jwa ga Dafita

¹ Pesalome ya ga Dafita e e kwaletsweng moopedisi,

² jale fa moporofeti Nathane a tla kwa go ene, Dafita a sena go tsena kwa go Batsheba.

³ Modimo, intshwarele ka fa bopelotlhomoging jwa gago, o phimole ditlolo tsa me ka fa boutlwelong-botlhoko jo bogolo jwa gago.

⁴ Ntlhapise sentle, o tlose tshiamololo ya me, o intshekise boleo.

⁵ Gonne ditlolo tsa me ke a di itse, boleo jwa me bo fa pele ga me ka gale.

⁶ Ke wena o le nosi fela yo ke go leofetseng, ka dira se mo matlhong a gago se leng bosula, gore e re fa o bua, o fitlhelwe o siame, mme o le phepa, fa o atlhola.

⁷ Bona, ke tsaletswe mo tshiamololong, mme mmê o nkamogetse mo boleong.

⁸ Bona, o natefelwa ke boammaaruri jwa pelo, o nkitsise botlhale mo go sa itsiweng.

⁹ Ntlose boleo ka mosiama gore ke itsheke; ntlhapise gore ke nne mosweu go gaisa semathana.

¹⁰ Nkutlwise boitumelo le thabo; a marapo a o a robileng a duduetse.

¹¹ Fitlhela maleo a me sefatlhego sa gago; o phimole ditshiamololo tsa me tsotlhe.

¹² Modimo, mpopele pelo e e itshekileng, o ntšhwafatse mowa o o tlhomameng mo teng ga me.

¹³ O se ka wa ntatlha fa pele ga sefatlhego sa gago; se tlose Mowa o o Boitshepo wa gago mo go nna.

¹⁴ Mpusetse boitumelo jwa pholoso ya gago, o ntshegetse ka mowa o o phuthologileng.

¹⁵ Batlodi ke tla ba ruta ditsela tsa gago gore baleofi ba sokologele kwa go wena.

¹⁶ Modimo, nkgolola mo molatong wa go tsholola madi, Modimo wa pholoso ya me, mme loleme lwa me lo tla dudueletsa tshiamo ya gago.

¹⁷ Morena, bula molomo wa me gore o bolele tumiso ya gago.

¹⁸ Gonne ga o natefelwe ke setlhabelo – nka bo ke se ntsha – ga o kgatlhwe ke setlhabelo sa phiso.

¹⁹ Ditlhabelo tsa Modimo ke mowa o o kgobegileng. Wena Modimo, ga o kitla o nyatsa pelo e e kgobegileng, e e phatlogileng.

²⁰ Direla Sione molemo ka fa natefelong ya gago; aga dipota tsa Jerusalema.

²¹ Foo o tla natefelwa ke ditlhabelo tsa tshiamo, e leng tsa phiso le tse di fisiwang gotlhe. Foo ba tla tlhabela dipoo mo aletareng ya gago.