Lipesalema 50 - Setswana 1970

Tirelo-Modimo ya nnete

¹ Pesalome ya ga Asafe. Modimo Morena yo o thata o a bua, o bitsa lefatshe go tswa kwa botlhabatsatsi go ya kwa bophirimatsatsi.

² Modimo o tswa ka phatsimo kwa Sione yo o tletseng bontle.

³ Modimo wa rona o e tla, mme ga o ka ke wa didimala; molelo o o nyeletsang o fa pele ga ona, mo tikologong ya ona go suma phefo e kgolo.

⁴ O tlhaeleletsa kwa legodimong kwa godimo le kwa lefatsheng go sekisa morafe wa ona wa re:

⁵ “Mphuthelang baratwa ba me ba ba dirileng kgolagano le nna ka setlhabelo.”

⁶ Magodimo a bolela tshiamo ya ona; gonne Modimo ke ona o o atlholang. Sela.

⁷ “Reetsang, batho ba me, ke rata go bua, Iseraele; ke tle ke supe ke go tiisetse gore ke nna Modimo, Modimo wa gago.

⁸ Ga ke go kgalemele ka ntlha ya ditlhabelo tsa gago; kana ditlhabelo tsa phiso tsa gago di ntse di le fa pele ga me ka gale.

⁹ Ga go batlege gore ke tsee poo mo sakeng la gago, le e seng diphoko kwa morakeng wa gago.

¹⁰ Gonne diphologolo tsotlhe tsa sekgwa ke tsa me, le ditshedi kwa dithabeng ka dikete.

¹¹ Ke itse dinonyane tsotlhe tsa loapi le tse di phelang mo nageng: Ke tsa me.

¹² Fa nka tshwarwa ke tlala, ga nka ke ka go kopa; gonne lefatshe lotlhe ke la me le tse di tletseng mo go lone.

¹³ A ke ja nama ya dipoo, a ke nwa madi a diphoko?

¹⁴ Ntshetsa Modimo setlhabelo sa tebogo ya pelo, o dirafatse maikano a o a ikanetseng Mogodimodimo.

¹⁵ O mpitse ka letsatsi la tlalelo; ke tla go namolela, mme o tla nkgalaletsa.”

¹⁶ Mme moikepi ena, Modimo o mo raya o re: “O balelang melao ya me le go bua kgolagano ya me ka molomo wa gago,

¹⁷ etswe o tlhoile kwatlhao, mme mafoko a me o a latlhela kwa morago ga gago?

¹⁸ Fa o bona legodu, o kgatlhwe ke go nna nalo, mme o tlhakanela boleo le baakafadi.

¹⁹ Molomo wa gago ò o letlelela go bua bosula, loleme lwa gago lo loga maano a tsietso.

²⁰ O nnetse go seba morwa-rraago; o pateletsa ngwana wa ga mmaago.

²¹ Dilo tse o di dirile, mme ka didimala. Wa ithaya wa re, ke tshwana fela le wena; ke tla go supetsa, ke di baya fa pele ga matlho a gago.

²² Tlhokomelang tlhe dilo tseo, lona ba lo lebalang Modimo, gore ke se ka ka gagoganya, mme ga tlhokwa yo o pholosang.

²³ Yo o ntshang setlhabelo sa tebogo ya pelo o a ntlotla; yo o tlhokomelang tsela ke tla mo naya gore a bone pholoso ya Modimo.”