Lipesalema 5 - Setswana 1970

Thapelo ya tshupelo ya mo mosong

¹ Pesalome ya ga Dafita e e kwaletsweng moopedisi; e opedisiwe ka ditlhaka.

² Morena, sekegela mafoko a me tsebe, o ele phegelo ya me tlhoko;

³ reetsa lentswe la me le le goelang thuso, Kgosi ya me le Modimo wa me, gonne ke rapela wena.

⁴ Morena, o tla utlwa lentswe la me mo mosong; ke tla go baakanyetsa tshupelo ya thapelo mo mosong, ke lebelela.

⁵ Gonne ga o Modimo o o natefelwang ke boikepo, mme yo o bosula ga a kitla a nna nao.

⁶ Baikgantshi ga ba kitla ba ema fa pele ga matlho a gago; o tlhoile botlhe ba ba dirang tshiamololo.

⁷ O tla nyeletsa ba ba buang maaka; monna wa polao le wa tsietso o tena Morena.

⁸ Mme nna nka tsena mo Ntlong ya gago ka ntlha ya bogolo jwa bopelotlhomogi jwa gago, ka obamela mo Tempeleng e e Boitshepo ya gago ke go boifa.

⁹ Morena, ntsamaise mo tshiamong ya gago ka ntlha ya baba ba me; tlhamalatsa tsela ya gago fa pele ga me.

¹⁰ Gonne ga go na sepe se se ikanyegang mo melomong ya bona; mateng a bona ke tshenyego; memetso ya bona ke mabitla a a atlhameng; ba rethefatsa diteme tsa bona.

¹¹ Ba bee molato, Modimo; a ba we ka ntlha ya maano a bona; ba leleke ka ntlha ya bontsi jwa ditlolo tsa bona; gonne ba a go rukhutlhegela.

¹² Mme botlhe ba ba go ikanyang a ba itumele, a ba duduetse ka gale, mme o ba femele. Le bona ba ba ratang leina la gago a ba ipele mo go wena.

¹³ Gonne o tshegofatsa mosiami, Morena, o mo dikanyetsa ka bopelonomi jaaka ka thebe.