Lipesalema 49 - Setswana 1970

Thata ya loso

¹ Pesalome ya boora Kora e e kwaletsweng moopedisi.

² Utlwang dilo tse, lona merafe yotlhe; reetsang lona lotlhe, ba lo agileng mo lefatsheng,

³ ba babotlana le ba bagolo, bahumi le bahumanegi mmogo;

⁴ molomo wa me o tla bua botlhale, mme se pelo ya me e se akanyang ke tlhaloganyo.

⁵ Ke tla sekegela seane tsebe; thabalakane ya ka ke tla e ranola ka harepa.

⁶ Kana ke tla boifelang mo malatsing a tlalelo, fa boikepo jwa basenyetsi ba me bo ntikanyeditse,

⁷ jwa bona ba ba ikantseng letlotlo la bona, ba belafalela khumo e kgolo ya bona?

⁸ Ga go na ope yo o ka rekololang morwa-rraagwe, le fa e le go ntshetsa Modimo tefo e e mo gololang –

⁹ gonne thekololo ya botshelo jwa gagwe e kgolo thata, mme o tla tlhobogela ruri go e ntsha –

¹⁰ gore a phelele ruri ka bosakhutleng, a se bone tshenyego.

¹¹ Gonne go bonwa gore batlhalefi ba a swa; masilo le ba ba se nang tlhaloganyo ba nyelela mmogo, mme khumo ya bona ba e tlogelela ba sele.

¹² Diphupu tsa bona ke tsone matlo a bona ka gale, ke maago a bona go ya tshikatshikeng, le fa ba ne ba taya mafatshe maina a bona.

¹³ Kana motho ga a nnele ruri mo bontlengtleng; o tshwana le diphologolo tse di nyelelang.

¹⁴ Ke yona tsela ya ba ba iikanyang le ya balatedi ba bona ba ba kgatlhwang ke mafoko a bona. Sela.

¹⁵ Ba fologela kwa felong ga baswi jaaka dinku tlhabong, loso ke modisa wa bona; ba tlhamalalela kwa lebitleng, popego ya bona e tla nyelela mo mosong, felo ga baswi e tla nna boago jwa bona.

¹⁶ Mme nna, Modimo o tla golola mowa wa me mo thateng ya felo ga baswi, gonne o tla ntshola. Sela.

¹⁷ O se ka wa boifa, fa motho a huma, fa kgalalelo ya ntlo ya gagwe e totafala.

¹⁸ Gonne e tla re fa a swa, a se ke a ye le sepe sa tseo tsotlhe; kgalalelo ya gagwe ga e nke e mo sala morago.

¹⁹ Le fa a ipoka mo bophelong jwa gagwe a re o tlhogonolo – kana batho ba a go boka, fa o iphelela monate –

²⁰ o tla ya kwa losikeng lwa borraagwe ba ba se kitlang ba bona lesedi ka bosakhutleng.

²¹ Motho yo o phelang mo bontlengtleng, mme a se na tlhaloganyo, o tshwana le diphologolo tse di nyelelang.