Lipesalema 48 - Setswana 1970

Sione ke motse wa kgosi e kgolo

¹ Pesalome e e leng sefela sa boora Kora.

² Morena o mogolo, mme o na le go tlotlwa thata mo motseng wa Modimo wa rona, mo thabeng ya ona e e boitshepo.

³ E ntle, thaba ya Sione, ka go gola ga yone; e itumelelwa ke lefatshe lotlhe. Ntlheng ya bokone go motse wa kgosi e kgolo.

⁴ Modimo o ikitsisitse mo matlong a ona a borena, fa e le ona tshireletso.

⁵ Gonne, bona, dikgosi di ne tsa phuthega, tsa bolola mmogo.

⁶ E rile di tlhoma di bona, tsa tlhoka puo, tsa tshoga, tsa tshaba ka poifo.

⁷ Thoromo e ne ya di tshwara teng, le botlhoko jwa di tshwara jaaka leralalo la mmelegi.

⁸ O thuba dikepe tsa Tharesise ka phefo ya botlhabatsatsi.

⁹ Re bonye mo motseng wa Morena wa masomosomo, mo motseng wa Modimo wa rona jaaka re utlwile: Modimo o tla o tlhomamisa go ya bosakhutleng. Sela.

¹⁰ Modimo, re gopola bopelotlhomogi jwa gago mo Tempeleng ya gago.

¹¹ Modimo, tumiso ya gago e fitlha kwa mafelelong a lefatshe fela jaaka leina la gago; seatla se se jang sa gago se tletse tshiamo.

¹² A thaba ya Sione e itumele, a bomorwadia Juta ba duduetse ka ntlha ya dikatlholo tsa gago.

¹³ Dikologang motse wa Sione, lo o potologeng, balang diturio tsa ona.

¹⁴ Elang dipota tsa phemelo tsa ona tlhoko, ralalang matlo a borena a ona gore lo tle lo bolelele losika lo lo tlang lo re:

¹⁵ Modimo o ke Modimo wa rona ka gale le ka bosakhutleng; o tla re goga go ya losong.