Lipesalema 44 - Setswana 1970

Selelo sa babogisiwi

¹ Sefela sa thuto sa boora Kora se se kwaletsweng moopedisi.

² Modimo, re utlwile ka ditsebe, borraetsho ba re boleletse ba re, o dirile tiro mo metlheng ya bona, malatsing a bogologolo.

³ O lelekile merafe ka letsogo la gago, mme bona wa ba tlhoma; o sentse ditšhaba, mme bona wa ba anamisa.

⁴ Gonne ba ruile lefatshe, e seng ka marumo a bona, e bile ga se mabogo a bona a a ba neileng phenyo; mme ke seatla sa gago se se jang le letsogo la gago le lesedi la sefatlhego sa gago; gonne o ne o natefelwa ke bona.

⁵ Modimo, ke wena kgosi ya me; laolela Jakobe diphenyo.

⁶ Re tla diga baganetsi ba rona ka wena; ba ba re tsogelang re tla ba gataka ka leina la gago.

⁷ Gonne ga ke ikanye bora jwa me, le tšhaka ya me ga e nke e mpha phenyo.

⁸ Mme ke wena o re namolang baba, o tlhabisa ba ba re tlhoileng ditlhong.

⁹ Re tla ipelafatsa ka gale ka Modimo; re baka leina la gago ka bosenabokhutlo. Sela.

¹⁰ Le fa go ntse jalo o re latlhile, wa re tlhabisa ditlhong, mme ga o a bolola le mephato ya rona.

¹¹ O re katisa ka morago fa pele ga mmaba, mme ba ba re tlhoileng ba thopa di-tsa-rona.

¹² O re abetse go tlhajwa jaaka dinku; o re faladitse mo merafeng.

¹³ O rekisitse batho ba gago ka tlhwatlhwa e e seng ya sepe; wa se ka wa bapala sepe ka tlhwatlhwa ya bona.

¹⁴ O re dira nyatsego mo go ba re bapileng nabo, le tshotlo le setshego mo go ba ba tikologong ya rona.

¹⁵ O re dira seane mo ditšhabeng, re ba ba thukhuthelwang ditlhogo ke merafe.

¹⁶ Tshotlego ya me e eme fa pele ga me ka gale; ditlhong tsa sefatlhego sa me di nkhurumeditse

¹⁷ ka ntlha ya go utlwa mosotli le mokgadi, le ka ntlha ya go bona mmaba le moipusolosetsi.

¹⁸ Tsotlhe tseo di re wetse, etswe re sa go lebala le e seng go ikanyologa kgolagano ya gago.

¹⁹ Dipelo tsa rona ga di a ka tsa kata ka morago, le dinao tsa rona ga di a ka tsa fapoga tsela ya gago.

²⁰ Le fa go ntse jalo o re papetletse mo mafelong a diphokojwe, wa re khurumetsa ka moriti wa loso.

²¹ Fa re ka bo re lebetse leina la Modimo wa rona, gongwe ra otlololela modimo wa seeng mabogo,

²² a Modimo o ka bo o sa go tlhotlhomisa, ka e le ona o o itseng se se fitlhegileng mo pelong?

²³ Mme re tlhola re bolawa ka ntlha ya gago, re kaiwa jaaka dinku tsa tlhabo.

²⁴ Thanya, Morena! O robaletseng? Tloga o eme, o se ka wa re latlhela ruri.

²⁵ O fitlhelang sefatlhego sa gago, o lebalelang pogisego ya rona le patikego ya rona?

²⁶ Gonne mewa ya rona e obegetse mo loroleng, mebele ya rona e kgomaretse mmu.

²⁷ Nanoga o re thuse, o be o re golole ka ntlha ya bopelotlhomogi jwa gago.