Lipesalema 41 - Setswana 1970

Thapelo mo bolwetseng

¹ Pesalome ya ga Dafita e e kwaletsweng moopedisi.

² Go sego motho yo o babalelang yo o kwa tlase; Morena o tla mo thusa ka letsatsi la tlalelo.

³ Morena o tla mmoloka, a mo phedisa; o tla kaiwa yo o sego mo lefatsheng; a ko o se mo neele mo keletsong ya baba ba gagwe.

⁴ Morena o tla mo oka mo diphateng tsa bolwetse; o fetola bolwetse jotlhe jwa gagwe mo bolaong.

⁵ Ke rile: “Morena, nkutlwele botlhoko; fodisa mowa wa me; gonne ke go leofetse.”

⁶ Baba ba me ba bua bosula ka ga me ba re: “O tla swa leng, leina la gagwe la nyelela?”

⁷ Mme e a re fa mongwe a tsile go ntekola, a bue maaka; pelo ya gagwe e ikgobokanyetse dilo tse di bosula; e re a tswela kwa ntle, a di bolele.

⁸ Botlhe ba ba ntlhoileng ba sebelana ka ga me, ba nkeleletsa bosula ba re:

⁹ “O tshetswe bolwetse jo bo setlhogo; mme jaanong yo o namaletseng jalo ga a nke a tlhola a tsoga.”

¹⁰ Tota le monna yo ke tsalanyeng nae, yo ke mo ikantseng, yo o jang dijo tsa me, o ntsholeleditse serethe.

¹¹ Mme wena, Morena, a o ko o nkutlwele botlhoko, o ntsose gore tseo ke tle ke di ba busetse.

¹² Se ke itseng ka sona gore ke a go kgatlha ke fa mmaba wa me a sa ntudueletse.

¹³ Mme nna o ntshegeditse, ka ke se na molato, o nkemisa fa pele ga sefatlhego sa gago ka bosakhutleng.

¹⁴ A Morena, Modimo wa Iseraele, a bakwe go tswa bosasimologeng go ya bosakhutleng. Amen, ee, a go nne jalo!