Lipesalema 38 - Setswana 1970

Thapelo mo bolwetseng

¹ Pesalome ya ga Dafita ya kgopotso mo tshupelong ya tebogo.

² Morena, se nkgalemele ka bogale jwa gago, se nkwatlhae mo kgakalong ya gago.

³ Gonne metsu ya gago e ntsepame, seatla sa gago se nkgateletse.

⁴ Ga go na boitekanelo bope mo nameng ya me ka ntlha ya kgakalo ya gago, le e seng pholo epe mo marapong a me ka ntlha ya boleo jwa me.

⁵ Gonne ditshiamololo tsa me di khurumeditse tlhogo ya me; di nkimela jaaka morwalo o o bokete.

⁶ Dintho tsa ka di a nkga, di tswa boladu ka ntlha ya bosilo jwa me.

⁷ Ke koname, ke hutaganye gotlhe; ke tlhola ke tsamaya ke hutsafetse.

⁸ Gonne letheka la me le tletse ditlhabi; ga go na boitekanelo bope mo nameng ya me.

⁹ Ke koafetse, ke tapetegile gotlhe, ke dumisiwa ke phegelo ya pelo ya me.

¹⁰ Morena, tlhologelelo yotlhe ya ka e go senogetse; phegelo ya ka ga e a go fitlhegela.

¹¹ Pelo ya me e a kubakuba, thata ya me e ntlogetse, lesedi la matlho a me le lone ga ke na nalo.

¹² Ba ba nthatang le ditsala tsa me ba emetse petso ya me fa thoko, le losika lwa me lo emetse kwa kgakala.

¹³ Mme ba ba tsomang bophelo jwa me ba nthaisitse; ba ba batlang go ntsenya mo tlalelong ba rera tatlhego ya ka, ba ntse ba akanya tsietso letsatsi lotlhe.

¹⁴ Mme nna ke ntse jaaka sesusu, ga ke utlwe; ke ntse jaaka semumu se se sa tsweng molomo.

¹⁵ Ee, ke tshwana le monna yo o sa utlweng, yo go se nang kganetso mo molomong wa gagwe.

¹⁶ Gonne ke lebeletse wena, Morena o tla araba, Morena, Modimo wa me.

¹⁷ Kana ke rile: “A ba ba inkgodisetsang ba se itumele ka nna, fa lonao lwa ka lo theekela.”

¹⁸ Gonne ke gaufi le go wa; botlhoko jwa ka bo ntse bo mpolaya ka gale.

¹⁹ Ee, ke ipobola molato wa ka, ke itshôla ka ntlha ya boleo jwa ka.

²⁰ Mme baba ba me ba tlhaga, e bile ba thata, le ba ba ntlhoileng fela ba ntsifetse.

²¹ Le ba ba ntuelang molemo ka bosula ba emelanye le nna, ka ke latelela se se molemo.

²² O se ka wa ntlogela, Morena; o se ka wa nna kgakala le nna, Modimo wa me.

²³ A o ko o itlhaganele go nthusa, Morena, Mopholosi wa ka.