Lipesalema 36 - Setswana 1970

Bopelontle jwa Modimo bo molemolemo jang ne!

¹ Pesalome ya ga Dafita, motlhanka wa Morena, e e kwaletsweng moopedisi.

² Mosenyi a re: “Maikaelelo a ka ke go senya.” Go tshoga Modimo ga a go itse.

³ Gonne o ikgatlha ka esi, a ithaya a re, molato wa gagwe ga o kitla o bonwa le e seng go tlhoiwa.

⁴ Mafoko a molomo a gagwe ke boikepo le tsietso; o gana go dira tsa botlhale le tse di molemo.

⁵ O akanya boikepo mo bolaong jwa gagwe; o ikemisa mo tseleng e e seng molemo; bosula ga a bo tlhoe.

⁶ Morena, bopelontle jwa gago bo fitlha kwa magodimong; boikanyego jwa gago bo fitlha kwa marung.

⁷ Tshiamo ya gago e ntse jaaka dithaba tsa Modimo; dikatlholo tsa gago ke boteng jo bogolo jwa metsi. Morena, o thusa batho le diphedi.

⁸ Kana bopelontle jwa gago, Modimo, bo molemolemo jang ne! Bana ba batho ba tshabele mo moriting wa diphuka tsa gago.

⁹ Ba ja monate wa monono wa Ntlo ya gago; o ba nosa mo nokeng ya dinatefo tsa gago.

¹⁰ Gonne motswedi wa bophelo o fa go wena; re bona lesedi ka lesedi la gago.

¹¹ Tsweletsa bopelontle jwa gago mo go bona ba ba go itseng, le tshiamo ya gago mo go bona ba ba dipelo di tlhamaletseng.

¹² A lonao lwa boikgantsho lo se nkgate, a diatla tsa baikepi di se nteleke.

¹³ Foo badiradibe ba tla bo ba ole, ba digilwe, mme ba tla palelwa ke go tsoga.