Lipesalema 35 - Setswana 1970

Dafita o rapela Modimo gore o betse baikepi

¹ Pesalome ya ga Dafita. Morena, ganetsa ba ba nkganetsang; tlhabana le ba ba tlhabanang le nna.

² Tsaya thejana le thebe, mme o nanogele thusong ya me.

³ Somola lerumo o thibelele babogisi ba me tsela; raya mowa wa me o re: “Ke nna pholoso ya gago.”

⁴ Ba ba batlang go mpolaya, a ba tlhajwe ke ditlhong, ba nyatsege; ba ba logang maano go ntirela kotsi, a ba busediwe kwa morago, ba sosobane.

⁵ A ba nne jaaka moko mo phefong, a moengele wa Morena a tle a ba kgophole.

⁶ A tsela ya bona e nne lefifi le boreledi, fa moengele wa Morena a ba leleka.

⁷ Gonne ba nkaletse letloa la bona ka bomo mo sephiring, ba nkepela lemena kwa ntle ga molato.

⁸ A tshenyego e mo wele a sa itse; a letloa le a le adileng sephiring le tshware ene; a a wele mo gopong ka esi.

⁹ Foo mowa wa me o tla ipela mo Moreneng, o itumelela thuso ya gagwe.

¹⁰ Marapo a me otlhe a tla re: “Morena, ke mang yo o tshwanang nao, yo o gololang motlhomolapelo mo go yo o mo fetang ka thata, le motho wa batho le mohumanegi mo go yo o mo thukhuthang?”

¹¹ Go tsoga basupi ba pateletso, ba mpotsa se ke sa se itseng.

¹² Ba ntuela molemo ka bosula; ke nosi fela.

¹³ Mme nna, e rile ba lwala, ka apara kgetse, ka bogisa mowa wa me ka go itima dijo; mme thapelo ya me e boetse sehubeng sa me.

¹⁴ Ke boaboetse jaaka e kete ke tsala ya me, e kete ke ngwana wa ga rre; ke tsamaile ke tlhoname ka bohutsana jaaka motho yo o lelelang mmaagwe.

¹⁵ Mme koô ya me ba a e itumelela, ba a phuthega; basotli le ba ke sa ba itseng ba a nkgobokanela, ba a kgoba, ga ba didimale.

¹⁶ Le ba e seng ba sepe ba a sotlasotla, ba ntšhenela meno.

¹⁷ Morena, o tla leba fela sebaka se se kana kang? Falodisa mowa wa me mo ditshenyong tsa bona, o o osi wa me mo ditawaneng.

¹⁸ Ke tla go leboga mo phuthegong e kgolo, ke go baka mo bathong ba bantsi.

¹⁹ Ba e leng baba ba me, ba se na lebaka, a ba se intumelele; a ba ba ntlhoileng ka bomo fela ba se getle ka leitlho.

²⁰ Gonne ga ba bue kagiso, ba akanya mafoko a tsietso ka ga badidimadi mo lefatsheng.

²¹ Ba nkatlhamiseditse melomo ba re: “Ahee, ahee, matlho a rona a bonye!”

²² Wena Morena o bonye; o se ka wa didimala; Morena, o se ka wa nna kgakala le nna.

²³ Thanya o nanogele go nkatlholela mo tshekong ya me, Modimo wa me le Morena wa me.

²⁴ Nkatlhola ka fa tshiamong ya gago, Morena, Modimo wa me, gore ba se itumele ka nna,

²⁵ ba se bue mo dipelong tsa bona ba re: “Ahee, re rata jalo!” ba se re: “Re mo meditse.”

²⁶ A ba ba itumelelang tlalelo ya me ba tlhajwe ke ditlhong, ba sosobane mmogo. A ba ba inkgodisetsang ba apesiwe nyatsego le ditlhong.

²⁷ A ba ba natefelwang ke tshiamo ya me ba ipele, ba itumele, ba bue ka gale ba re: “Morena o mogolo yo o kgatlhwang ke kagiso ya motlhanka wa gagwe.”

²⁸ Mme loleme lwa me lo tla bolela tshiamo ya gago le pako ya gago letsatsi lotlhe.