Lipesalema 34 - Setswana 1970

Morena o femela modumedi

¹ Pesalome ya ga Dafita, e a e kwadileng jale, fa a itira setsenwa fa pele ga Abimelege, yo o neng a mo leleka, mme a tsamaya.

² Ke rata go baka Morena ka metlha yotlhe, tumiso ya gagwe e tla nna mo molomong wa me ka gale.

³ Mowa wa me o tla ipelafatsa ka Morena. Baitshoki ba tla utlwa, ba itumela.

⁴ Godisang Morena le nna, a re tlotlomatseng leina la gagwe mmogo.

⁵ Ke ne ka batla Morena, mme a nkaraba, a ba a nkgolola mo dipoifong tsotlhe tsa me.

⁶ Ba ba lebileng ena ba galalela difatlhego, mme difatlhego tsa bona ga di kitla di sosobana.

⁷ Motho yo wa batho o biditse, mme Morena a utlwa, a mo thusa mo ditlalelong tsotlhe tsa gagwe.

⁸ Moengele wa Morena o thibelela tikologong ya bona ba ba mmoifang, a ba golola.

⁹ Lekang lo bone, fa Morena a le molemo; go sego monna yo o itiketsang ka ene.

¹⁰ Boifang Morena, lona baitshepi ba gagwe; gonne ba ba mmoifang ga ba nke ba tlhoka sepe.

¹¹ Ditawana di a tlhoka, di bolawa ke tlala; mme ba ba batlang Morena bona ga ba kitla ba tlhoka molemo ope.

¹² Bana ke lona, tlayang lo ntheetse! Ke rata go lo ruta go boifa Morena.

¹³ Motho ke ofe yo o eletsang bophelo, a rata bontsi jwa malatsi gore a tle a bone molemo?

¹⁴ Thibela loleme lwa gago mo bosuleng, le molomo wa gago gore o se ka wa bua tsietso.

¹⁵ Thibogela bosula, o dire molemo; batla kagiso, o bo o e latelele.

¹⁶ Matlho a Morena a lebile ba ba mmoifang; ditsebe tsa gagwe di sekegetswe go lelela thuso ga bona.

¹⁷ Sefatlhego sa Morena se kgatlhanong le ba ba dirang bosula gore a fedise go gopolwa ga bona mo lefatsheng.

¹⁸ Basiami ba biditse, mme Morena a utlwa, a ba golola mo ditlalelong tsotlhe tsa bona.

¹⁹ Morena o gaufi le ba ba pelo di thubegileng, o pholosa ba ba mewa e kgobegileng.

²⁰ Dipogo tsa mosiami di dintsi, mme Morena o di mo namolela tsotlhe.

²¹ O boloka marapo otlhe a gagwe, ga go lepe la ona le le robiwang.

²² Bosula bo bolaya moikepi; ba ba tlhoileng mosiami ba tla bonwa molato.

²³ Morena o golola mewa ya batlhanka ba gagwe; botlhe ba ba mo ikanyang ga ba kitla ba bonwa molato.