Lipesalema 33 - Setswana 1970

Sefela sa go opelela Mong-wa-thata-yotlhe. Bopelontle jwa Modimo le boitshwarelo jwa ona

¹ Lona basiami, dudueletsang Morena, sefela sa pako se tshwanetse batlhamaladi.

² Bakang Morena ka kitara, lo mo opelele ka harepa e e dithapo di le some.

³ Mo opeleleng sefela se sešwa, letsang sentle ka tumo e kgolo;

⁴ gonne lefoko la Morena ke nnete, le go dira gotlhe ga gagwe go a ikanyega.

⁵ O rata tshiamo le molao; lefatshe lotlhe le tletse bopelotlhomogi jwa Morena.

⁶ Magodimo a dirilwe ka lefoko la Morena, le lesomo lotlhe la ona ka mowa wa molomo wa gagwe.

⁷ O kgobokanya metsi a lewatle e kete mo lekukeng, o tsenya merwalela mo difaleng.

⁸ A lefatshe lotlhe le boife Morena, a botlhe ba ba agileng mo lefatsheng ba rorome fa pele ga gagwe.

⁹ Gonne o buile, mme ga direga; a laola, ga ba ga nna teng.

¹⁰ Morena o nyeleditse kgakololo ya ditšhaba, a senya maano a merafe.

¹¹ Kgakololo ya Morena e tlhomame ka bosakhutleng, le maano a pelo ya gagwe go ya tshikatshikeng.

¹² Go sego morafe o Morena e leng Modimo wa ona, batho ba a ba itlhaoletseng go nna boswa jwa gagwe.

¹³ Morena o leba a le mo legodimong, o bona bana ba batho botlhe;

¹⁴ a le mo felong ga boago jwa gagwe, o lebile botlhe ba ba agileng mo lefatsheng;

¹⁵ ena yo o bopileng dipelo tsa bona botlhe, yo o tlhokometseng ditiro tsotlhe tsa bona.

¹⁶ Kgosi ga e fenye ka mophato o mogolo; mogale ga a pholosiwe ka thata e kgolo.

¹⁷ Pitse ga e ikanyege go ka isa phenyong; ga e ka ke ya pholosa ope ka thata e kgolo ya yona.

¹⁸ Bonang, leitlho la Morena le lebile bona ba ba mmoifang, bona ba ba lebeletseng bopelontle jwa gagwe,

¹⁹ gore a pholose maphelo a bone mo losong, le go ba phedisa, fa ba le mo tlaleng.

²⁰ Mewa ya rona e lebeletse Morena; ke ena thuso ya rona le thebe ya rona.

²¹ Gonne dipelo tsa rona di itumela mo go ena, ka re ikanya leina le le boitshepo la gagwe.

²² Morena, a bopelontle jwa gago bo nne mo go rona, fela ka fa re go lebeletseng ka teng.