Lipesalema 32 - Setswana 1970

Lesego la go itshwarelwa maleo

¹ Pesalome ya ga Dafita. Sefela sa thuto. Go sego ena yo o itshwaretsweng ditlolo, yo boleo jwa gagwe bo bipilweng.

² Go sego motho yo Morena o sa mmaleleng tshiamololo, yo tsietso e se yong mo moweng wa gagwe.

³ E rile ke didimala, marapo a me a remega ka go duma ga me ka letsatsi lotlhe.

⁴ Gonne letsogo la gago le ne le le bokete mo go nna bosigo le motshegare; bokgola jwa me jwa fetoga komelelo ya selemo. Sela.

⁵ Ke ne ka go ipobolela boleo jwa me, mme ka se ka ka fitlha tshiamololo ya me. Ke rile: “Ke tla ipobolela Morena ditlolo tsa me,” mme wa tlosa molato wa boleo jwa me. Sela.

⁶ Ka ntlha ya moo modumedi mongwe le mongwe o tla go rapela mo motlheng o ò ka bonwang ka ona; ruri, le fa merwalela e tla gwasa, ga e kitla e fitlha fa go ena.

⁷ Ke wena phemelo ya me; o nkefosa mo pitlaganong; o ntikanyetsa ka difela tsa kgololego. Sela.

⁸ Ke tla go itsise, ke go ruta tsela e o tshwanetseng go e tsamaya; ke tla go gakolola ke tsepile matlho a me mo go wena.

⁹ Se tshwaneng le pitse gongwe moulwe tse di se nang tlhaloganyo, tse mekgabo ya tsona e leng tshipi le marapo go di thapisa, ka di gana go go atamela.

¹⁰ Moikepi o na le mahutsana a mantsi; mme yo o ikanyang Morena, boutlwelo-botlhoko bo tla mo dikanyetsa.

¹¹ Itumeleng mo Moreneng, lo bo lo ipele, lona basiami; duduetsang, lona lotlhe ba lo dipelo di tlhamaletseng.