Lipesalema 31 - Setswana 1970

Selelo le thapelo le tebogo

¹ Pesalome ya ga Dafita e e kwaletsweng moopedisi.

² Ke ikanya wena, Morena; a ke se ka ka tlhajwa ke ditlhong ka bosakhutleng; nkgolola ka tshiamo ya gago.

³ Ntshekegele tsebe, o nkgolole ka bonako; o nne lefika la me la botshabelo le ntlo ya phemelo kwa thabeng ya go nthusa.

⁴ Gonne ke wena lefika la me le botshabelo jwa me; ka moo o nkgoge, o ntsamaise ka ntlha ya leina la gago.

⁵ O tla ntshwatola mo letloeng le ba nthaisitseng ka lone mo sephiring; gonne ke wena botshabelo jwa me.

⁶ Ke neela mowa wa me mo seatleng sa gago, ke wena yo o nkgolotseng, Morena, Modimo o o ikanyegang.

⁷ O ila ba ba direlang medimo ya boithamako, mme nna ke ikanya Morena.

⁸ Ke tla duduetsa, ke itumela ka ntlha ya bopelontle jwa gago, ka o bonye pogisego ya me, wa ba wa tlhokomela mowa wa me mo ditlalelong.

⁹ Mme ga o a ka wa ntsenya mo seatleng sa mmaba; dinao tsa me o di tlhomile mo patlelong e e atlhameng.

¹⁰ Nkutlwele botlhoko, Morena, gonne ke pitlagantswe; leitlho la me le mowa wa me le mmele wa me di tlhontse ka bohutsana.

¹¹ Gonne bophelo jwa me bo fedisiwa ke tshwenyego, le dinyaga tsa me ke phegelo; thata ya me e reketla ka ntlha ya tshiamololo ya me, marapo a me a a kgobega.

¹² Ke nyatsegile mo baganetsing ba me botlhe, bogolo mo go ba ke bapileng nabo, ka nna yo o tshosang mo go ba ke itsanyeng nabo. Ba ba mponang kwa mmileng ba a ntshaba.

¹³ Ke lebetswe mo pelong jaaka moswi; ke ntse jaaka nkgwana e e thubegileng.

¹⁴ Gonne ke utlwa kgalo ya batho ba le bantsi. Poitshego e ntlheng tsotlhe, ka ba gakololana ka ga me; ba ikaeletse go mpolaya.

¹⁵ Mme nna ke ikantse wena, Morena, ka re: “O Modimo wa me.”

¹⁶ Sebaka sa me se mo seatleng sa gago. Nkgolole mo diatleng tsa baba ba me le mo go ba ba ntelekileng.

¹⁷ Phatsimisetsa motlhanka wa gago sefatlhego sa gago, o nthuse ka boutlwelo-botlhoko jwa gago.

¹⁸ Morena, se ntese ka tlhajwa ke ditlhong, gonne ke goela kwa go wena. A baikepi ba tlhajwe ke ditlhong, a ba tlhoke puo kwa felong ga baswi.

¹⁹ A melomo ya maaka e didimadiwe, e e buang ka makgakga ka ga mosiami ka boikgantsho le lenyatso.

²⁰ Kana molemo wa gago o mogolo jang, o ò o boloketseng ba ba go boifang, wa o direla bona ba ba go ikanyang fa pele ga bana ba batho.

²¹ O ba fitlha mo botikelong jwa sefatlhego sa gago ka ntlha ya dikhuduo tsa batho; o ba fitlha mo motlaaganeng gore ba se ka ba angwa ke dikgantsho tsa diteme.

²² A Morena a bakwe, ka a ntiretse boutlwelo-botlhoko jwa gagwe ka mokgwa o o gakgamatsang mo motseng o o thata.

²³ Le gale nna, e rile ke tshoga, ka re: “Ke kgaotswe, ke tlositswe fa pele ga matlho a gago.” Mme ruri, ya re ke goela thuso kwa go wena, wa utlwa selelo sa mekokotlelo ya me.

²⁴ Ratang Morena, lona lotlhe baratiwa ba gagwe. Morena o boloka ba ba ikanyegang; mme o duela ka botlalo ene yo o dirang ka boikgantsho.

²⁵ Nametsegang, mme a dipelo tsa lona di natlafale, lona lotlhe ba lo lebelelang Morena.