Lipesalema 30 - Setswana 1970

Bogale jwa Modimo ke jwa sebakanyana, mme molemo wa ona ke wa bosakhutleng

¹ Pesalome ya ga Dafita. Sefela sa kgakolo ya Tempele.

² Ke tla go godisa, Morena; gonne o ntshwatotse, mme ga o a ka wa leseletsa baba ba me go itumela ka ga me.

³ Morena, Modimo wa me, ke goetse thuso kwa go wena, mme o mphodisitse.

⁴ Morena, o tlhatlositse mowa wa me mo felong ga baswi, o mphedisitse ke le mo go bona ba ba fologelang mo moleteng.

⁵ Opelelang Morena, lona baratwi ba gagwe, lo bake segopotso sa boitshepo jwa gagwe.

⁶ Gonne bogale jwa gagwe ke jwa sebakanyana, mme bopelontle jwa gagwe ke jwa bophelo jotlhe. Maitsiboa go lale go le selelo, mme mo mosong go tsoge go le boitumelo.

⁷ Mo boiketlong jwa me ke itheile ka re: “Ga nkitla ke tshikinyega ka bosenabokhutlo.”

⁸ Morena, e rile o intumelela, wa nkemisa mo thabeng ya me e e thata; mme ya re o fitlha sefatlhego sa gago, ka tshoga.

⁹ Ka goela kwa go wena, Morena, ka kopa Morena ka mekokotlelo ka re:

¹⁰ “Go tla go thusa eng, fa madi a me a tshololwa, ke fologela mo lebitleng? A lerole le ka go baka, a le ka bolela boammaaruri jwa gago?

¹¹ Utlwa, Morena, o ntlhomogele pelo; Morena, o nne mothusi wa me.”

¹² Selelo sa me o se mphetoletse pina, o nkapotse lesela la khutsafalo, wa ntlama ka boitumelo

¹³ gore kgalalelo ya me e go opelele pako, mme e se didimale. Morena, Modimo wa me, ke tla go leboga ka bosakhutleng.