Lipesalema 3 - Setswana 1970

Sefela sa mo mosong

¹ Pesalome ya ga Dafita ya sebaka sa fa a tshaba Abesalomo morwawe.

² Morena, kana baganetsi ba me ba atile jang! Ba bantsi ba ba ntsogelang,

³ ba bantsi ba ba buang ka ga me ba re: “Ga a na thuso epe mo Modimong.” Sela.

⁴ Mme wena, Morena, o thebe e e ntshireletsang, o tlotlo ya me le motsholetsi wa tlhogo ya me.

⁵ Ke tlhaeleleditse thata go Morena, mme a nkutlwa, a le mo thabeng ya gagwe e e boitshepo. Sela.

⁶ Ke ne ka rapama, ka robala; ka ba ka thanya; gonne Morena o a nkokotletsa.

⁷ Ga nkitla ke boifa dikete tse di masome tsa batho ba ba ntsogetseng ba ntikanyeditse.

⁸ Tloga o eme, Morena; mpholose, Modimo wa me! Gonne o iteile baba ba me botlhe mo lotlhaeng, o robile meno a baikepi.

⁹ Pholoso e mo Moreneng; tshegofatso ya gago e okame morafe wa gago. Sela.