Lipesalema 27 - Setswana 1970

Morena ke lesedi le pholoso mo ntweng

¹ Pesalome ya ga Dafita. Morena ke lesedi la me le pholoso ya me; ke tla boifa mang? Morena ke botshabelo jwa bophelo jwa me; ke tla tshoga mang?

² E a re fa basenyi ba ntsogela go tla go ja nama ya me, e bong baganetsi ba me le baba ba me, ba kgopiwe ka nosi, ba we.

³ Le fa ntwa e ka ntikanyetsa, pelo ya me ga e kitla e boifa; le fa tlhabano e ka ntlhasela, le foo ke tletse boikanyo.

⁴ Selo se le sengwe se ke se kopileng mo go Morena, se ke se eletsang ke go re, ke nne mo Ntlong ya Morena ka metlha yotlhe ya bophelo jwa me, go leba bontle jwa Morena le go akanya mo Tempeleng ya gagwe.

⁵ Gonne o mpoloka mo boagong jwa gagwe mo letsatsing la tlalelo; o mphitlha mo botikelong jwa Tente ya gagwe, o ntsholeletsa mo lefikeng.

⁶ Mme jaanong tlhogo ya me e tla bo e tsholetsegile godimo ga baba ba me ba ba mo tikologong ya me, mme ke rata go tlhaba ditlhabelo tsa meduduetso mo Tenteng ya gagwe. Ke rata go opela, go opelela Morena dipako.

⁷ Utlwa, Morena, ke kua ka lentswe le legolo; nkutlwele botlhoko, o nkarabe.

⁸ Pelo ya me e bolela lefoko la gago le le reng: “Batlang sefatlhego sa me.” Ka moo ke batla sefatlhego sa gago, Morena.

⁹ Se mphitlhele sefatlhego sa gago, se kobe motlhanka wa gago ka bogale; wena yo o neng o le thuso ya me, se ntatlhe, o se ntlogele, Modimo o o mpholosang.

¹⁰ Rre le mme ba ntlogetse, mme Morena o a nkamogela.

¹¹ Morena, nthute tsela ya gago, o ntsamaise mo tselaneng e e papannweng ka ntlha ya baba ba me.

¹² O se ka wa ntsenya mo thateng ya baganetsi ba me; gonne ke tsogetswe ke basupi ba maaka, le mongwe yo o sumelang go senya.

¹³ Fa nka bo ke sa dumela gore ke tla bona molemo wa Morena mo lefatsheng la baphedi, nka bo ke latlhegile.

¹⁴ Lebelela Morena o namatshege; a pelo ya gago e tie, mme o solofele Morena.