Lipesalema 26 - Setswana 1970

Thapelo yo mokopa-thuso yo o se nang molato

¹ Pesalome ya ga Dafita. Ntshiamisetsa, Morena, gonne ke ntse ke tsamaya ke se na molato, ke ikantse Morena ke sa tshikinyege.

² Ntlhotlhomise, Morena, o nkeleke; tlhatlhoba diphilo tsa me le pelo ya me.

³ Gonne bopelotlhomogi jwa gago bo fa pele ga matlho a me, mme ke tsamaya mo boaammaaruring jwa gago.

⁴ Ga ke nne le batho ba maaka, ga ke phele le maferefere.

⁵ Ke ila phuthego ya basulafatsi, mme ga ke nne le baikepi.

⁶ Ke tlhapa diatla mo bosenangmolato, mme ke tla potologa aletare ya gago, Morena,

⁷ gore ke utlwatse lentswe la pako le go bolela dikgakgamatso tsotlhe tsa gago.

⁸ Morena, ke rata boago jwa Ntlo ya gago, e bong felo fa kgalalelo ya gago e agileng teng.

⁹ Se gogoreletse mowa wa me le baleofi, le e seng bophelo jwa me le batshololamadi;

¹⁰ ba go leng ditshenyo mo diatleng tsa bona, ba mabogo a a jang a bona a tletseng theko ya phaposo.

¹¹ Mme nna ke tsamaya ke se na molato. Nkgolola, Morena, o be o intshwarele.

¹² Lonao lwa me lo eme mo patlelong, ke tla tumisa Morena mo diphuthegong.