Lipesalema 25 - Setswana 1970

Boitshwarelo le tshireletso

¹ Pesalome ya ga Dafita. Ke tsholeletsa mowa wa me kwa go wena, Morena.

² Modimo wa me, ke a go ikanya. A ke se tlhajwe ke ditlhong, a baba ba me ba se ntudueletse.

³ Ee, mo go botlhe ba ba go lebeletseng ga go ope yo o tla tlhajwang ke ditlhong. Ba ba tla tlhajwang ke ditlhong ke ba ba ikepang kwa ntle ga lebaka.

⁴ Morena, nkitsise ditsela tsa gago, o nthute ditselana tsa gago.

⁵ Ntsamaise mo boammaaruring jwa gago, o nthute; gonne ke wena Modimo wa pholoso ya me; ke lebeletse wena ka gale.

⁶ Morena, gopola mautlwelo-botlhoko a gago le maitshwarelo a gago, gonne a ntse a le teng ka bosenatshimologo.

⁷ O se ka wa gopola maleo a bokau jwa me le ditlolo tsa me. Nkgopole ka fa boitshwarelong jwa gago ka ntlha ya molemo wa gago, Morena.

⁸ Morena o molemo, ke wa nnete. Ke gona ka moo a rutang baleofi tsela.

⁹ Ba ba pelonolo o ba tsamaisa ka tshiamo; ba ba pelonolo o ba ruta tsela ya gagwe.

¹⁰ Ditselana tsotlhe tsa Morena ke tsa bopelotlhomogi le boammaaruri mo go bona ba ba bolokang kgolagano ya gagwe le ditshupo tsa gagwe.

¹¹ Morena, intshwarele molato wa me ka ntlha ya leina la gago, gonne o mogolo.

¹² Motho yo o boifang Morena ke mang? O tla mo ruta ka ga tsela e o tshwanetseng go e itlhaolela.

¹³ Ene ka esi o tla aga a le tlhogonolo; losika lwa gagwe lo tla rua lefatshe.

¹⁴ Morena o kopana le ba ba mmoifang, o ba itsise kgolagano ya gagwe.

¹⁵ Matlho a me a lebile Morena ka gale; gonne o tla ntsha dinao tsa me mo letloeng.

¹⁶ Retologela kwa go nna, o intshwarele; gonne ke nosi, mme ke tlaletswe.

¹⁷ Ditlalelo tsa pelo ya me di oketsegile thata. Nnamolela mo dipatikegong tsa me.

¹⁸ Leba tlalelo ya me le thekisego ya me, mme maleo a me o a intshwarele otlhe.

¹⁹ Leba baba ba me, gonne ba bantsi; ba ntlhoile ka letlhoo le le bolayang.

²⁰ Boloka mowa wa me, o nkgolole. A ke se tlhajwe ke ditlhong, gonne ke a go ikanya.

²¹ A bosenamolato le nnete di mpoloke; gonne ke go lebeletse.

²² Modimo, golola Iseraele mo ditlalelong tsotlhe tsa gagwe.