Lipesalema 24 - Setswana 1970

Kgosi ya kgalalelo e a tsena

¹ Pesalome ya ga Dafita. Lefatshe ke la Morena le tsotlhe tse di mo go lone; lefatshe le ba ba agileng mo go lone.

² Gonne o le theile mo mawatleng, a le tlhomamisa mo dinokeng.

³ Ke mang yo o tla tlhatlogelang mo thabeng ya Morena? Ke mang yo o tla emang mo felong ga gagwe ga boitshepo?

⁴ Ke ena yo o diatla di phepa, yo o pelo e itshekileng; yo o sa lebiseng mowa wa gagwe kwa boithamakong, a sa ikanele maaka.

⁵ Ena yoo o tla amogela tshegofatso mo Moreneng le tshiamo mo Modimong wa pholoso ya gagwe.

⁶ Ke lone losika lwa ba ba o tlhokomelang, ba ba batlang sefatlhego sa gago, Modimo wa ga Jakobe. Sela.

⁷ Lona dikgoro, tsholetsang ditlhogo; lona mejako ya bogologolo tala, itsholetseng gore Kgosi ya kgalalelo e tsene.

⁸ Mme Kgosi ya kgalalelo ke mang? Ke Morena yo o thata, yo o bonatla, Morena, senatla mo tlhabanong.

⁹ Lona dikgoro, tsholetsang ditlhogo, ee, itsholetseng, lona mejako ya bosakhutleng, gore Kgosi ya kgalalelo e tsene.

¹⁰ Mme Kgosi eo ya kgalalelo ke mang? Ke Morena wa masomosomo – ke ena Kgosi ya kgalalelo. Sela.