Lipesalema 22 - Setswana 1970

Modimo wa me, o ntlogeletseng?

¹ Pesalome ya ga Dafita e e kwaletsweng moopedisi ka moopelo wa: “Tshephe ya mahube.”

² Modimo wa me, Modimo wa me, o ntlogeletseng, wa nna kgakala le thuso ya me, kgakala le mafoko a selelo se segolo sa me?

³ Modimo wa me, ke bitsa motshegare, mme ga o nkarabe; le mo bosigong ke a lela, mme ga ke gomotsege.

⁴ Etswe o le Moitshepi, wena yo o agileng mo dipakong tsa Iseraele.

⁵ Borraetsho ba ne ba go ikanya, ba ne ba ikanya, mme o ba golole.

⁶ Ba ne ba goela kwa go wena, mme ba pholosiwa; ba ne ba go ikanya, mme ba se ka ba tlhajwa ke ditlhong.

⁷ Mme nna ke seboko fela, ga ke motho; ke lesotlwa la batho le monyatsegi wa morafe.

⁸ Botlhe ba ba mponang ba sotla ka nna, ba petla melomo, ba thukhutha ditlhogo ba re:

⁹ “O pitiketse matshwenyego kwa Moreneng! A ene a mo golole, a mo pholose, fa a kgatlhwa ke ene.”

¹⁰ Ee, ke wena yo o nntshitseng mo mmeleng wa ga mme; wa ntapolosa mo mabeleng a ga mme.

¹¹ Ke sa le ke latlhelwa mo go wena, fa ke tsalwa; o Modimo wa me go tswa botsalong jwa me.

¹² Se nne kgakala le nna, gonne pitlagano e gaufi, mme ga go na mothusi.

¹³ Dipoo tse dintsi di ntikanyeditse; dipoo tse di thata tsa Basane di ntikile.

¹⁴ Di nkatlhamiseditse magano a tsona, jaaka tau e e gagolang, e e dumang.

¹⁵ Ke tsholotswe jaaka metsi, marapo otlhe a me a lokologile; pelo ya me e fetogile ya nna jaaka mmotu, e gakologile mo teng ga me.

¹⁶ Thata ya me e omeletse jaaka lengetana, loleme lwa me lo kgomaretse magalapa a me; mme o ntatsa mo loroleng lwa loso.

¹⁷ Gonne dintšwa di ntikanyeditse, lesomo la basenyi le ntsentse gare; ba phuntse diatla tsa me le dinao tsa me.

¹⁸ Nka bala marapo otlhe a me, mme bone ba a mpona, ba ntebile ba kgatlhega.

¹⁹ Ba kgaogana diaparo tsa me, mme kojwana ya me ba e tlhamela tengwa.

²⁰ Mme wena, Morena, se nne kgakala le nna, wena thata ya me, itlhaganelele go nthusa.

²¹ Pholosa botshelo jwa me mo tšhakeng, botshelo jo bo nosi jwa me mo thateng ya ntšwa.

²² Nkgolole mo leganong la tau, o nkarabe (ka go mpholosa) mo dinakeng tsa dinare.

²³ Ke rata go bolelela ba ga etsho leina la gago, ke go tumisa mo phuthegong:

²⁴ “Lona ba lo boifang Morena, mo galaletseng; lona boora Jakobe lotlhe, mo tlotleng; lona boora Iseraele lotlhe, mmoifeng!

²⁵ Gonne ga a ka a nyatsa tlalelo ya motlalelwi, le e seng go tenwa ke yona, le e seng go mo fitlhela sefatlhego, mme e rile a goela thuso kwa go ene, a mo ngoka.”

²⁶ Pako ya me mo phuthegong e kgolo e tswa mo go wena. Maikano a me ke tla a dirafatsa fa pele ga bone ba ba mmoifang.

²⁷ Ba ba pelonolo ba tla ja, ba kgora; ba ba batlang Morena ba tla mo galaletsa. A dipelo tsa lona di lapologe ka bosakhutleng!

²⁸ Dikhutlo tsotlhe tsa lefatshe di tla gakologelwa, di boela kwa Moreneng, mme ditshika tsotlhe tsa merafe di tla obamela fa pele ga gago.

²⁹ Gonne bogosi ke jwa Morena, o busa merafe.

³⁰ Botlhe ba ba robetseng mo diphupung ba tla obamela ene fela; botlhe ba ba fologetseng kwa leroleng ba tla khubama fa pele ga gagwe, mme ke ene yo mowa wa me o mo phelelang.

³¹ Losika lo lo tlang lo tla mo direla; losika lo lo kwa pele lo tla bolelelwa ka ga Morena.

³² Ba tla tla ba itsise morafe o o tla tsalwang tshiamo ya gagwe gore Morena o dirile jalo.