Lipesalema 21 - Setswana 1970

Tebogo ya phenyo

¹ Pesalome ya ga Dafita e e kwaletsweng moopedisi.

² Morena, kgosi e itumelela thata ya gago, e dudueletsa thuso ya gago bogolo jang ne!

³ O e neile se pelo ya yona e se eletsang; ga o a ka wa gana kopo ya molomo wa yona. Sela.

⁴ Gonne o ne wa e kgatlhantsha ka ditshegofatso tsa molemo, wa e rwesa tlhogo ka serwalo sa gouta e ntlentle.

⁵ E kopile bophelo mo go wena, o bo e neile, botshelo jo boleele ka gale le ka bosakhutleng.

⁶ Tlotlo ya yona e kgolo ka thuso ya gago; o beile tlotlo le borena mo go yona.

⁷ Gonne o e beile go nna lesego le legolo thata ka bosakhutleng, wa e itumedisa ka boitumelo fa pele ga gago.

⁸ Gonne kgosi e ikanya Morena; mme ka bopelotlhomogi jwa Mogodimodimo ga e kitla e theekela.

⁹ Letsogo la gago le tla fitlha kwa babeng botlhe ba gago; letsogo le le jang le tla tshwara ba ba go tlhoileng.

¹⁰ O tla ba direla jaaka pesetso ya molelo, mogang o ipontshang. Morena o tla ba metsa mo bogaleng jwa gagwe, molelo o tla ba nyeletsa.

¹¹ Leungo la bona o tla le nyeletsa, o le tlosa mo lefatsheng, le losika lwa bona mo baneng ba batho.

¹² Ba ne ba go gopoletse bosula, ba go logetse maano, mme ba sa nonofa go a dirafatsa.

¹³ O tla ba hularisa ka go lebisa dithapo tsa bora jwa gago kwa difatlhegong tsa bona.

¹⁴ Morena, nanoga o bonale ka thata ya gago; mme re tla opelela bonatla jwa gago, re bo baka.