Lipesalema 20 - Setswana 1970

Thapelo ya go rapelela kgosi, fa e bololela ntweng

¹ Pesalome ya ga Dafita e e kwaletsweng moopedisi.

² A Morena a go utlwe ka letsatsi la tlalelo; a leina la Modimo wa ga Jakobe le go femele.

³ A a go romele thuso e e tswang mo Felong-ga-Boitshepo, a go kokotletse a le mo Sione.

⁴ A a gopole ditshupelo tsotlhe tsa gago tsa dijo; a be a itumelele setlhabelo sa gago sa phiso. Sela.

⁵ A a go neye se pelo ya gago e se eletsang, a dirafatse maikaelelo otlhe a gago.

⁶ Re tla dudueletsa phenyo ya gago, re tlhoma difoka ka leina la Modimo wa rona. A Morena a dirafatse dikopo tsotlhe tsa gago.

⁷ Jaanong ke itse gore Morena o thusa motlodiwa wa gagwe, a mo utlwa a le kwa legodimong le le boitshepo la gagwe ka thata e e pholosang ya letsogo le le jang la gagwe.

⁸ Bangwe ba boka dikoloi tsa tlhabano, ba bangwe ba boka dipitse; mme rona re baka leina la Morena, Modimo wa rona.

⁹ Bao, ba obegile ba wa; mme rona re tsogile re eme ka tlhomamo.

¹⁰ Morena, thusa kgosi, o re utlwe mogang re go bitsang.