Lipesalema 2 - Setswana 1970

Tlhabano le phenyo ya ga Mesia

¹ Kana merafe e huduelang, ditšhaba di akanyetsang dilo tsa boithamako?

² Dikgosi tsa lefatshe di a ikemisa le babusi ba nnela go logisanya maano a go lwa le Morena le Motlodiwa wa gagwe ba re:

³ “A re kgaoleng dikgole tsa bone, megala ya bone re e tlose mo go rona, re e latlhe!”

⁴ Ene yo o agileng mo legodimong o a tshega, Morena o a ba sotla.

⁵ Foo o tla bua nabo ka bogale jwa gagwe, o tla ba tshosa ka kgakalo ya gagwe:

⁶ “Mme nna, kana ke tlhomile kgosi ya me mo Sione, mo thabeng ya me e e boitshepo!”

⁷ Ke rata go bolela ka ga maikaelelo a Morena. O ntheile a re: “O morwaake, ke go tsetse kajeno.

⁸ Lopa mo go nna, mme ke tla go naya merafe go nna boswa jwa gago, le dikhutlo tsa lefatshe go nna leruo la gago.

⁹ O tla ba robaganya ka thobane ya tshipi; o tla ba thubaganya jaaka sejana sa letsopa.”

¹⁰ Ka moo he, tlhalefang, lona dikgosi; tlhagisiwang, lona baatlhodi ba lefatshe.

¹¹ Direlang Morena ka poifo, lo duduetse ka thoromo.

¹² Atlang Morwa gore a se ka a gakala, mme lwa latlhega mo tseleng. Gonne bogale jwa gagwe bo ka akofa jwa tuka. Go sego bona botlhe ba ba mo ikanyang.