Lipesalema 149 - Setswana 1970

Sefela sa pako le sa tšhaka ya tlhabano

¹ Haleluya! Opelelang Morena sefela se sešwa le pako ya gagwe mo phuthegong ya baratwi!

² A Iseraele a itumelele Modiri wa gagwe; a bana ba Sione ba dudueletse kgosi ya bona!

³ A ba bake leina la gagwe ka dipina, ba mo leletse moropa le harepa.

⁴ Gonne Morena o natefelwa ke batho ba gagwe; o kgabisa ba ba pelonolo ka pholoso.

⁵ A baratwi ba letse megolokwane ka tlotlo; ba duduetse ba le mo malaong a bona,

⁶ dipôkô tsa Modimo di le mo melomong ya bona le tšhaka e e magale mabedi mo diatleng tsa bona,

⁷ go dirafatsa pusoloso mo ditšhabeng le dipetso mo merafeng

⁸ go golega dikgosi tsa yona ka dikeetane le batlotlegi ba yona ka mefiri ya tshipi

⁹ go dirafatsa mo go bona katlholo e e kwadilweng. Seo ke tlotlo ya baratwi ba gagwe. Haleluya!