Lipesalema 148 - Setswana 1970

A dibopiwa tsotlhe di bake Morena

¹ Haleluya! Bakang Morena, lo le mo magodimong; mmakeng, lo le mo mafelong a a godimo!

² Mmakeng lona baengele ba gagwe botlhe; mmakeng lona masomosomo a gagwe otlhe!

³ Mmakeng lona letsatsi le ngwedi; mmakeng lona dinaledi tsotlhe tse di phatsimang!

⁴ Mmakeng lona magodimo a magodimo le metsi a a leng kwa godimo ga magodimo.

⁵ A di bake leina la Morena; gonne o laotse, mme tsa tlholega.

⁶ Mme o di tlhomamiseditse ruri; o beile molao o di sa ka keng tsa o tlola.

⁷ Bakang Morena, lo le mo lefatsheng, lona dikgwanyape tsa mawatle le madiba otlhe,

⁸ le wena molelo le sefako le semathana le musi le phefo ya ledimo le le dirafatsang lefoko la gagwe.

⁹ Lona dithaba le dithabana tsotlhe; lona ditlhare tse di ungwang le mesetere yotlhe;

¹⁰ lona diphologolo le diruiwa tsotlhe; lona dilo tse di gagabang le lona dinonyane tse di diphuka;

¹¹ lona dikgosi tsa lefatshe le merafe yotlhe, lona dikgosana le baatlhodi botlhe ba lefatshe;

¹² lona makau le lona makgarebe, lona batsofe mmogo le bana –

¹³ botlhe a ba bake leina la Morena; gonne leina la gagwe ke lone fela le le godileng. Borena jwa gagwe bo mo lefatsheng le mo legodimong.

¹⁴ O godiseditse morafe wa gagwe lonaka; ke se se bokwang ke batlhomogelwa botlhe ba gagwe, e bong Baiseraele, morafe o o gaufi nae. Haleluya!