Lipesalema 147 - Setswana 1970

Pesalome ya pako

¹ Galaletsang Morena! Gonne go pila go leletsa Modimo wa rona, ee, go monate; sefela sa pako se tshwanetse.

² Morena o aga Jerusalema, o phutha balelekwi ba Iseraele.

³ O fodisa ba ba dipelo di phatlogileng, o fapa dintho tsa bona.

⁴ O tlhomamisa palo ya dinaledi, tsotlhe o di taya maina.

⁵ Morena wa rona o mogolo, o thata e kgolo; tlhaloganyo ya gagwe ga e ka ke ya lekanngwa.

⁶ Morena o kakatlolola ba ba pelonolo; mme baikepi bona o ba digela fa fatshe.

⁷ Tlhabelang Morena sefela sa tebogo; opelelang Modimo wa rona ka harepa;

⁸ ona o o apesang legodimo ka maru, o o baakanyetsang lefatshe pula, o o medisang bojang mo dithabeng;

⁹ o o nayang diruiwa dijo tsa tsona, le magakajane, fa a lela.

¹⁰ Ga o natefelwe ke thata ya pitse, ga o kgatlhwe ke dikgoka tsa monna.

¹¹ Morena o kgatlhwa ke ba ba mmoifang, ba ba solofetseng bopelonomi jwa gagwe.

¹² Jerusalema, galaletsa Morena; Sione, baka Modimo wa gago.

¹³ Gonne o thatafaditse mephakarego ya mejako ya gago; o tshegofaditse bana ba gago mo go wena.

¹⁴ Ke ona o o nayang lefatshe la gago kagiso, o o go jesang mabele a a nang le moko.

¹⁵ O romela taolo ya ona kwa lefatsheng; Lefoko la ona le siana thata.

¹⁶ O tlhotlhora semathana jaaka boboa, o gasa serame jaaka molora.

¹⁷ O latlhela sefako sa ona jaaka dikgapetla. Ke mang yo o ka itshokelang letsididi la ona?

¹⁸ O roma Lefoko la ona, o di gakolose; o fokisa phefo ya ona, metsi a ele.

¹⁹ O itsise Jakobe Lefoko la ona, o itsise Iseraele melao ya ona le dithulaganyo tsa ona.

²⁰ Ga o ise o ke o direle morafe ope jalo, mme dikatlholo tsa ona ga ba di itse. Haleluya!