Lipesalema 146 - Setswana 1970

Modimo o e leng mothusi o le osi wa boammaaruri

¹ Haleluya! Baka Morena, wena mowa wa me!

² Ke tla nna ke galaletsa Morena ke ntse ke phela; ke tla nna ke opelela Modimo wa me ke sa ntse ke le yo.

³ Lo se ka lwa ikanya barena, le e seng ngwana wa motho yo go se nang thuso epe mo go ena.

⁴ Fa mowa wa gagwe o tswa, o boela gape kwa mmung wa gagwe; maikaelelo a gagwe a fele ka lone letsatsi leo.

⁵ Go sego ena yo Modimo wa ga Jakobe e leng thuso ya gagwe, yo tsholofelo ya gagwe e leng mo go Morena, Modimo wa gagwe,

⁶ yo o dirileng legodimo le lefatshe le lewatle le tsotlhe tse di mo go tsona; yo o bolokang boammaaruri ka bosakhutleng;

⁷ yo o direlang bapatikwi tshiamo, ba ba tlala a ba fe dijo. Morena o golola bagolegwi.

⁸ Morena o foufolola difofu; Morena o tsosa ba ba obegileng; Morena o rata basiami.

⁹ Morena o boloka baeng, o gomotsa dikhutsana le batlholagadi; mme tsela ya baikepi yona a e kgopamise.

¹⁰ Morena ke kgosi ka bosakhutleng; e bong Modimo wa gago, Sione, go ya tshikatshikeng. Haleluya!