Lipesalema 144 - Setswana 1970

Thapelo ya go fenya le setshwantsho sa lesego le le kwa pele

¹ Pesalome ya ga Dafita. A go bakwe Morena, lefika la me, yo o rutileng diatla tsa me go tlhabana le menwana ya me go lwa;

² e bong Montlhomogelapelo le Montshireletsi; Momphemedi le Mompholosi; thebe ya me le yo ke mo ikanyang, yo o tsenyang morafe wa me mo taolong ya me.

³ Morena, kana motho ke eng, fa o mo itse, le ngwana wa motho, fa o mo tlhokomela?

⁴ Motho o tshwana le pudulo fela; malatsi a gagwe a feta jaaka moriti.

⁵ Morena, sekamisa legodimo la gago o fologe; ama dithaba gore di kue musi.

⁶ Gadimisa legadima, mme o ba phatlalatse; roma metsu ya gago, o ba tseanye.

⁷ Ntsha mabogo a gago, o le kwa godimo, o nkinole; o ntshwatole mo merwaleleng, mo diatleng tsa baeng,

⁸ ba melomo ya bona e buang maaka, ba diatla tsa bona tse di jang e leng tsa tsietso!

⁹ Modimo, ke tla go opelela sefela se sešwa, ke go leletsa harepa ya dithapo di le some.

¹⁰ Ke wena yo o nayang dikgosi phenyo, yo o falodisang Dafita, motlhanka wa gago, mo tšhakeng e e senyang.

¹¹ Ntshwatole o nkgolole mo diatleng tsa baeng, ba melomo ya bona e buang maaka ba diatla tsa bona tse di jang e leng tsa tsietso!

¹² A bomorwaa-rona ba nne mo bokaung jwa bona jaaka ditlhatshana tse di godisitsweng; le bomorwadia-rona ba nne jaaka maotwana a sekhutlo a a setilweng ka fa mokgweng wa kago ya matlo a borena.

¹³ A difala tsa rona di tlale, go ntshiwe mefutafuta ya dijo mo go tsona; a difutshane tsa rona di ate ga dikete, di ntsifale ga dikete tse some mo mafulong a rona.

¹⁴ A dikgomo tsa rona di tsale di se folotse go se nne nyelelo le e seng go lelela kotsi mo dipatlelong tsa rona.

¹⁵ Go sego morafe o o dirafalelwang ke tseo; go tlhogonolo morafe o Morena e leng Modimo wa ona!