Lipesalema 142 - Setswana 1970

Thapelo mo pogisong e e thata

¹ Sefela sa thuto sa ga Dafita, fa a ne a le mo logageng. Thapelo.

² Ke goela Moreneng ke tlhatlositse lentswe; ke lelela boitshwarelo mo Moreneng ke tsholeditse lentswe.

³ Ke tshololela selelo sa me fa pele ga gagwe, ke bega tlalelo ya me fa pele ga gagwe.

⁴ Fa ke nyema moko, wena o itse tsela ya me. Ba mpeetse serai mo tseleng e ke tshwanetseng go e tsamaya.

⁵ Ke lebile ntlheng ya letsogo le le jang, ke fitlhela go se na ope yo o nkitseng; botshabelo jwa me bo ile; ga go ope yo o mpotsang bophelo.

⁶ Ke goela kwa go wena, Morena, ke re: “Ke wena botshabelo jwa me le kabelo ya me mo lefatsheng la baphedi.”

⁷ Ela selelo sa me tlhoko; gonne ke koafetse segolo; nkgolole mo babogising ba me; gonne ba mpheta ka thata.

⁸ Nntshe mo kgolegong gore ke galaletse leina la gago. Basiami ba tla ntikanyetsa, fa o ntirela molemo.