Lipesalema 141 - Setswana 1970

Kopo ya go sa tseneng mo thaelong le mo pogisong

¹ Pesalome ya ga Dafita. Morena, ke a go bitsa; itlhaganele, o tle go nna; utlwa lentswe la me, fa ke goela go wena.

² A thapelo ya me e nne jaaka maswalo fa pele ga gago; a tsholetso ya me ya mabogo e nne jaaka tshupelo ya maitsiboa.

³ Morena, beela molomo wa me tiso; lebelela mojako wa molomo wa me.

⁴ Se sokololele pelo ya me kwa selong se se bosula go dira ditiro tsa boikepo le banna ba ba dirang bosula, mme a ke se je monate o ba o jang.

⁵ Mosiami a ka ntitaya, ke ka lorato, a ka nkwatlhaya, ke lookwane lwa tlhogo; tlhogo ya me ga e kitla e lo gana. Le fa go ntse jalo ke rapela ka ntlha ya masula a bona.

⁶ Fa baatlhodi ba bona ba digwa mo makgotlhong, ba tla utlwa mafoko a me, fa e le a a monate.

⁷ Marapo a rona a gasagasegile fa mojakong wa felo ga baswi jaaka fa motho a lema, a gagola lefatshe.

⁸ Gonne matlho a me a lebile wena Modimo Morena; ke batla botshabelo fa go wena; se ntshe mowa wa me mo nameng.

⁹ Mphemele mo thateng ya segole se ba nthaisitseng ka sona, le mo dirung tsa ba ba dirang bosula.

¹⁰ A baikepi ba wele mo lemeneng la bona botlhe mmogo, mogang nna ke fetang ke falola.