Lipesalema 140 - Setswana 1970

Kopo ya phemelo mo baikeping

¹ Pesalome ya ga Dafita e e kwaletsweng moopedisi.

² Morena, nkgolole mo bathong ba ba bosula; o mpoloke mo banneng ba ba bodipa,

³ ba ba akanyang dilo tse di bosula mo pelong, ba tsosa ntwa ka malatsi otlhe.

⁴ Ba itooditse diteme, ba tshwana le dinoga; botlhole jwa lebolobolo bo mo maganong a bona. Sela.

⁵ Morena, mpoloke mo diatleng tsa moikepi, o mphemele mo banneng ba ba bogwama, ba ba ikaeletseng go ntigela lengopeng.

⁶ Baikgantshi ba mphitlhetse mutlwane le serai, ba mpeetse letloa fa thoko ga tsela, ba nthaisitse ka seru. Sela.

⁷ Ke buile le Morena ka re: “O Modimo wa me.” Morena, reetsa lentswe la mekokotlelo ya me.

⁸ Modimo Morena, wena thuso e e thata ya me, ke wena yo o femelang tlhogo ya me ka letsatsi la tlhabano.

⁹ Morena, o se ka wa dirafatsa dikeletso tsa moikepi; a maano a o a logileng a se kgonege, ba ka tla ba ikgodisa. Sela.

¹⁰ Fa ba ka tsholetsa ditlhogo tikologong ya me, a tshenyo ya diteme tsa bona e ba khurumetse.

¹¹ A Morena a nesetse magala mo go bona, a ba digele mo molelong, mo bodibeng gore ba se ka ba tlhola ba tsoga.

¹² A monna wa puo e e bosula a se ka a tlhomama mo lefatsheng; monna yo o bodipa a tlalelo e mo leleke gangwe le gape.

¹³ Ke a itse, fa Morena a tla emela kgang ya motlalelwi le tshiamelo ya mohumanegi.

¹⁴ Ruri, basiami ba tla leboga leina la gago, ba nnete ba tla aga fa pele ga gago.