Lipesalema 14 - Setswana 1970

Boikepo jwa motho

¹ Pesalome ya ga Dafita e e kwaletsweng moopedisi. Lesilo le bua mo pelong ya lone le re: “Modimo ga o yo.” Ba a senya, ba dira tsa maila; ga go ope yo o dirang molemo.

² Morena o lebile bana ba batho a le mo legodimong, go bona, fa go le mongwe yo o botlhale, yo o batlang Modimo.

³ Ba fapogile botlhe, ba senyega mmogo. Ga go ope yo o dirang molemo, le e seng a le mongwe fela.

⁴ A botlhe ba ba dirang tshiamololo ga ba na kitso, bona ba ba metsang batho ba me jaaka ba ja senkgwe? Morena ga ba mmitse.

⁵ Foo ba tla tshoga mo go boitshegang; gonne Modimo o mo losikeng lo lo siameng.

⁶ Maano a ba a logelang mmogisegi a tla ba tlhabisa ditlhong, gonne Morena ke botshabelo jwa gagwe.

⁷ E kete pholoso ya Iseraele e ka bo e tla e e tswang mo Sione! E ne e tla re Morena a fetola tatlhego ya morafe wa gagwe, Jakobe a duduetse, Iseraele a itumele.