Lipesalema 138 - Setswana 1970

Go lebogela kgololo

¹ Pesalome ya ga Dafita. Ke tla go galaletsa ka pelo yotlhe, ke go opelela pako fa pele ga medimo.

² Ke tla obamela ke lebile Tempele e e Boitshepo ya gago, ke galaletsa leina la gago ka ntlha ya bopelontle jwa gago le boikanyego jwa gago; gonne o godisitse leina la gago bogolo go tsotlhe.

³ O nkutlwile mo letsatsing le ke go biditseng ka lone, wa nnaya bopelokgale le thata mo moweng.

⁴ Morena, dikgosi tsotlhe tsa lefatshe di tla go galaletsa, fa di utlwile mafoko a molomo wa gago.

⁵ Di tla opela ka ga ditsela tsa Morena, ka kgalalelo ya Morena e le kgolo.

⁶ Gonne Morena o godimo, mme o leba yo o boikokobetso; mme yo o ikgodisang ena o mo itse a sa le kgakala.

⁷ Fa ke tsamaya ke le mo pitlaganong, ke wena yo o mphedisang; kgakalo ya baba ba me o e ntshetsa seatla, mme letsogo le le jang la gago le a nthusa.

⁸ Morena o tla di nkgonela. Bopelontle jwa gago, Morena, ga bo na bokhutlo; se tlogele ditiro tsa diatla tsa gago!