Lipesalema 136 - Setswana 1970

Bopelontle jwa Morena bo ka bosakhutleng

¹ Lebogang Morena, gonne o molemo; gonne bopelotlhomogi jwa gagwe ke jo bo sa khutleng.

² Lebogang Modimo wa medimo; gonne bopelotlhomogi jwa ona ke jo bo sa khutleng.

³ Lebogang Morena wa barena; gonne bopelothomogi jwa gagwe ke jo bo sa khutleng.

⁴ Ena yo o dirang dikgakgamatso tse dikgolo a le esi; gonne bopelotlhomogi jwa gagwe ke jo bo sa khutleng.

⁵ Yo o dirileng legodimo ka botlhale; gonne bopelothomogi jwa gagwe ke jo bo sa khutleng.

⁶ Yo o ngamotseng lefatshe godimo ga metsi; gonne bopelotlhomogi jwa gagwe ke jo bo sa khutleng.

⁷ Yo o dirileng masedi a magolo; gonne bopelotlhomogi jwa gagwe ke jo bo sa khutleng.

⁸ Letsatsi go laola motshegare; gonne bopelotlhomogi jwa gagwe ke jo bo sa khutleng.

⁹ Ngwedi le dinaledi go laola bosigo; gonne bopelothomogi jwa gagwe ke jo bo sa khutleng.

¹⁰ Yo o iteileng Baegepeto ka go bolaya maitibolo a bona; gonne bopelotlhomogi jwa gagwe ke jo bo sa khutleng.

¹¹ A ntsha Iseraele mo gare ga bona; gonne bopelotlhomogi jwa gagwe ke jo bo sa khutleng;

¹² ka seatla se se thata le ka letsogo le le otlologileng; gonne bopelotlhomogi jwa gagwe ke jo bo sa khutleng.

¹³ Yo o kgaogantseng Lewatle le Lehibidu ka bogare; gonne bopelotlhomogi jwa gagwe ke jo bo sa khutleng.

¹⁴ A tshedisa Iseraele fa gare ga lone; gonne bopelotlhomogi jwa gagwe ke jo bo sa khutleng.

¹⁵ Mme a digela Farao le mephato ya gagwe mo Lewatleng le Lehibidu; gonne bopelotlhomogi jwa gagwe ke jo bo sa khutleng.

¹⁶ Yo o ne a ralatsa batho ba gagwe dikaka; gonne bopelotlhomogi jwa gagwe ke jo bo sa khutleng.

¹⁷ Yo o fentseng dikgosi tse dikgolo; gonne bopelotlhomogi jwa gagwe ke jo bo sa khutleng.

¹⁸ A bolaya dikgosi tse di tumileng; gonne bopelotlhomogi jwa gagwe ke jo bo sa khutleng.

¹⁹ Sihone, kgosi ya Baamori; gonne bopelotlhomogi jwa gagwe ke jo bo sa khutleng;

²⁰ le Oge, kgosi ya Basane; gonne bopelotlhomogi jwa gagwe ke jo bo sa khutleng.

²¹ Mme a aba lefatshe la bona go nna boswa; gonne bopelotlhomogi jwa gagwe ke jo bo sa khutleng;

²² go nna boswa jwa ga Iseraele, motlhanka wa gagwe; gonne bopelotlhomogi jwa gagwe ke jo bo sa khutleng.

²³ Yo o re gopotseng mo bobotlaneng jwa rona; gonne bopelotlhomogi jwa gagwe ke jo bo sa khutleng.

²⁴ A re swatola mo go ba ba re pitlagantseng; gonne bopelotlhomogi jwa gagwe ke jo bo sa khutleng.

²⁵ Yo o fang ditshedi tsotlhe dijo; gonne bopelotlhomogi jwa gagwe ke jo bo sa khutleng.

²⁶ Lebogang Modimo wa magodimo; gonne bopelotlhomogi jwa ona ke jo bo sa khutleng.