Lipesalema 132 - Setswana 1970

Go rapelela Ntlo ya Modimo le ntlo ya ga Dafita

¹ Sefela sa go ya Tempeleng. Morena, gopola Dafita le matshwenyego otlhe a gagwe,

² yo o neng a ikanela Morena, a solofetsa Modimo o o thata wa ga Jakobe a re:

³ “Ruri, ga nka ke ka tsena mo ntlong ya me ya tente, le fa e le go ya go lala mo phateng e ke e aletsweng;

⁴ ga nka ke ka fa matlho a me boroko, le fa e le dintshi tsa me kotselo,

⁵ go ya ke be ke bonele Morena bonno, le Modimo o o thata wa ga Jakobe meago.”

⁶ Bona, re utlwetse Letlole kwa Eferatha, ra le fitlhela mo nageng ya Jaare.

⁷ A re yeng kwa boagong jwa gagwe, re obamele fa pele ga sebeo sa dinao tsa gagwe.

⁸ Nanoga, Morena, o ye kwa bonnong jwa gago jwa boikhutso, wena le Letlole la thata ya gago.

⁹ A baperesiti ba gago ba apare tshiamo; a baratiwa ba gago ba duduetse.

¹⁰ O se ka wa gana motlodiwa wa gago ka ntlha ya ga Dafita, motlhanka wa gago.

¹¹ Morena o ikanetse Dafita ka boammaaruri – ga a kitla a bo tlhanogela – a re: “Yo e leng wa leungo la mmele wa gago ke tla mmaya mo sedulong sa bogosi sa gago.

¹² Fa bomorwao ba ka tlhokomela kgolagano ya me le ditshupo tsa me tse ke di ba rutang, foo bomorwaa-bone le bone ba tla nnela ruri mo sedulong sa bogosi sa gago.”

¹³ Gonne Morena o itlhaoletse Sione, a mo eletsa gore e nne boago jwa gagwe a re:

¹⁴ “Fa ke gona felo ga me ga boikhutso go ya bosakhutleng; fa ke gona fa ke tla agang teng; gonne ke go eleditse.

¹⁵ Dijo tsa teng ke tla di tshegofatsa segolo, bahumanegi ba gona ke ba kgorisa bogobe.

¹⁶ Baperesiti ba teng ke tla ba apesa pholoso; ba ba tlhomogetsweng pelo ba gona ba tla duduetsa thata.

¹⁷ Foo ke tla tlhogisetsa Dafita lonaka; ke baakanyeditse motlodiwa wa me lobone.

¹⁸ Ke tla apesa baba ba gagwe ditlhong; mme serwalo sa bogosi se se mo go ene se tla phatsima.”