Lipesalema 130 - Setswana 1970

Selelo sa motlalediwi

¹ Sefela sa go ya Tempeleng. Ke goela kwa go wena Morena, ke le mo botennye.

² Morena, utlwa lentswe la me; a ditsebe tsa gago di nne di tlhokomele mekokotlelo e ke e tlhatlosang.

³ Morena, fa o ka lotolotsa melato, Morena, go ka ema mang?

⁴ Mme boitshwarelo bo fa go wena gore o tle o boifiwe.

⁵ Ke lebeletse Morena, mowa wa me o lebeletse, ke bile ke solofela lefoko la gagwe.

⁶ Mowa wa me o lebeletse Morena go gaisa badisa, fa ba lebeletse moso, ee, go gaisa badisa, fa ba lebeletse moso.

⁷ Iseraele, o lebelele Morena; gonne bopelotlhomogi bo mo Moreneng; o na le kgololo e kgolo.

⁸ Ke ene yo o tla gololang Iseraele mo ditshiamololong tsotlhe tsa gagwe.