Lipesalema 13 - Setswana 1970

Dafita o tshabela thapelong

¹ Pesalome ya ga Dafita e e kwaletsweng moopedisi.

² Morena, go tla nna goleele go le kae? A o tla ntebalela ruri? O tla mphitlhela sefatlhego sa gago sebaka se se kana kang?

³ Ke tla akanya goleele go le kae mo moweng wa me, ke tlhola ke tletse bohutsana mo pelong? Mmaba wa me o tla inkgodisetsa sebaka se se kana kang?

⁴ A o ko o bone, o nkutlwe, Morena, Modimo wa me! Sedifatsa matlho a me gore ke se robale thobalo ya loso,

⁵ le gore mmaba wa me a se re: “Ke mo fentse,” mme baganetsi ba me ba se ipele, fa ke theekela.

⁶ Mme nna, ke ikanya boitshwarelo jwa gago; pelo ya me e tla ipelela thuso ya gago. Ke tla opelela Morena pako, ka a ntiretse molemo.