Lipesalema 129 - Setswana 1970

Bokhutlo jwa baba ba Baiseraele

¹ Sefela sa go ya Tempeleng. “Ba sa le ba mpitlaganya gantsintsi go tswa bokaung jwa me” – a Baiseraele ba bue jalo ba re:

² “Ba sa le ba mpitlaganya gantsintsi go tswa bokaung jwa me, mme ga ba a ka ba mphenya.

³ Balemi ba lemile mo mokokotlong wa me; ba leelefatsa mesele ya bona ya mogoma.

⁴ Morena o siame; o kgaotse dikgole tsa baikepi.”

⁵ A ba tlhajwe ke ditlhong, ba kate ka morago bona botlhe ba ba tlhoileng Sione.

⁶ A ba nne jaaka bojang jo bo tlhogang mo godimo ga ntlo, jo bo omelelang bo ise bo kumolwe,

⁷ jo mosegi o sa bo tlatseng seatla, le e seng yo o bofang dingata go bo tlatsa letsogo;

⁸ fa bafeti ba sa ka keng ba bua teng ba re: “A tshegofatso ya Morena e nne le lona, re lo tshegofatsa ka leina la Morena.”