Lipesalema 124 - Setswana 1970

A go bakwe mogolodi wa Iseraele

¹ Sefela sa go ya Tempeleng sa ga Dafita. Fa e ka bo e ne e se Morena yo o neng a re emela – a Iseraele a re jalo –

² fa e ka bo e ne e se Morena yo o neng a re emela, jale fa batho ba re tsogela,

³ foo ba ka bo ba re meditse re sa phela, jale fa ba re tukela bogale.

⁴ Foo noka e ka bo e re gogotse, metsi a ka bo a re betile.

⁵ Foo metsi a a gogomogileng a ka bo a re khurumeditse.

⁶ A go bakwe Morena yo o sa re tlogelelang go garolwa ke meno a bona.

⁷ Mewa ya rona e falotse jaaka nonyane mo mutlwaneng wa mothaisi; mogala o kgaogile, mme rona re falotse.

⁸ Thuso ya rona e mo leineng la Morena, Modiri wa legodimo le lefatshe.