Lipesalema 122 - Setswana 1970

Loboko lwa go baka Jerusalema

¹ Sefela sa go ya Tempeleng sa ga Dafita. E rile ba nthaya ba re: “A re yeng kwa Ntlong ya Morena!” ka itumela.

² Dinao tsa rona di eme mo dikgorong tsa gago, Jerusalema.

³ Wena, Jerusalema, yo o agilweng jaaka motse o o kitlantsweng sentle,

⁴ kwa ditso di tlhatlogelang teng, e bong ditso tsa Morena: Ke molao wa Baiseraele go baka leina la Morena teng.

⁵ Gonne ditulo tsa katlholo di eme teng, ditulo tsa ntlo ya ga Dafita.

⁶ Kopang kagiso ya Jerusalema; a ba ba go ratang ba phele ka iketlo.

⁷ A go nne kagiso mo kagong ya phemelo ya lobota lwa gago, le boiketlo mo matlong a gago a borena.

⁸ Ke tla bua ka ntlha ya bana ba ga rre le dilekane tsa me ke re: “A kagiso e nne mo go wena!”

⁹ Ke tla go batlela se se molemo ka ntlha ya Ntlo ya Morena, Modimo wa rona.