Lipesalema 120 - Setswana 1970

Tsa maeto a phuthego

¹ Thapelo ya go batla go femelwa mo basotling. Sefela sa go ya Tempeleng. Ke goetse Moreneng, ke le mo pitlaganong, mme a nkutlwa.

² Morena, nkgolola mo molomong wa maaka, mo lolemeng lwa tsietso.

³ O tla go nayang, a go okeletsa eng, wena, loleme lwa tsietso?

⁴ Metsu e e bogale ya dinatla e e nang le magala a mohudiri!

⁵ A tatlhego ya me wee, ka ke jakile mo Mesege, ka ke agile fa ditenteng tsa Ketare!

⁶ E setse e le sebaka se se fetang selekanyo ke ntse ke agile fa go bona ba ba tlhoileng kagiso.

⁷ Nna ke wa kagiso, mme fa ke bua, bona ba batla ntwa fela.