Lipesalema 119 - Setswana 1970

Kgalaletso ya Lefoko la Modimo

¹ Go sego bona ba ditsela tsa bona di itekanetseng, ba ba tsamayang ka fa molaong wa Morena.

² Go sego ba ba tlhokomelang ditshupo tsa gagwe, ba ba mmatlang ka pelo yotlhe,

³ ee, bona ba ba sa direng tshiamololo, mme ba tsamaya mo ditseleng tsa gagwe.

⁴ Ditaolo tsa gago o di ntshitse gore di tlhokomelwe ruri.

⁵ E kete ditsela tsa me di ka bo di tlhomame go tlhokomela melao ya gago.

⁶ Foo nka bo ke sa tlhajwe ke ditlhong, fa nka bo ke tlhokomela ditaelo tsa gago tsotlhe.

⁷ Ke tla go leboga ka boammaaruri jwa pelo, fa ke ithuta dithulaganyo tse di siameng tsa gago.

⁸ Melao ya gago ke tla e ela tlhoko. A o ko o se ka wa ntlogelela ruri.

⁹ Lekau le ka boloka bophepa jwa tsela ya lone jang? Ka go e lebanya le Lefoko la gago.

¹⁰ Ke go batla ka pelo yotlhe; se ntese ka fapoga ditaelo tsa gago.

¹¹ Ke bolokile Lefoko la gago mo pelong ya me gore ke se ka ka go leofela.

¹² A go bakwe wena, Morena, nthuta melao ya gago.

¹³ Ditao tsotlhe tsa molomo wa gago ke di boletse ka molomo.

¹⁴ Ke itumelela tsela ya ditshupo tsa gago bogolo go mefutafuta ya dikhumo.

¹⁵ Ke tla akanya ditaolo tsa gago ke ele ditselana tsa gago tlhoko.

¹⁶ Ke tla natefelwa ke melao ya gago, ga nkitla ke lebala Lefoko la gago.

¹⁷ Ntirele molemo ke le motlhanka wa gago gore ke phele, ke tle ke boloke Lefoko la gago.

¹⁸ Mpudulola matlho gore ke itse go bona dikgakgamatso mo molaong wa gago.

¹⁹ Ke moeng mo lefatsheng; o se ka wa mphitlhela ditaelo tsa gago.

²⁰ Mowa wa me o nyoretswe ditao tsa gago ka gale.

²¹ O bôpetse baikgogomosi, ba ba hutsitsweng ba ba fapogang ditaelo tsa gago.

²² Pitikolola kgobo le nyatsego mo go nna; gonne ke tshegeditse ditshupo tsa gago.

²³ Le fa dikgosi di nnetse go ntogela maano, motlhanka wa gago ena o akanya melao ya gago.

²⁴ Ee, ditshupo tsa gago di monate mo go nna, di a nkgakolola.

²⁵ Mowa wa me o kgomaretse lorole. A o ko o mphedise ka fa Lefokong la gago.

²⁶ Ke boletse ditsela tsa me, mme wa nkutlwa. A o ko o nthute melao ya gago.

²⁷ Ntlhaloganyetse tsela ya ditaolo tsa gago, mme ke tla akanya dikgakgamatso tsa gago.

²⁸ Mowa wa me o ntsha dikeledi ka ntlha ya bohutsana, nnamolola ka fa Lefokong la gago.

²⁹ Tsela ya maaka e beele kgakala le nna, o ntlhogonolofatse ka molao wa gago.

³⁰ Tsela ya boammaaruri ke yona ke e itlhophetseng, ka baya ditao tsa gago fa pele ga me.

³¹ Ke ngaparetse ditshupo tsa gago, Morena, a ke se tlhajwe ke ditlhong.

³² Ke taboga mo tseleng ya ditaelo tsa gago; gonne o oketsa pelo ya me.

³³ Morena, nthute tsela ya melao ya gago, mme ke tla e tseela ruri go ya bokhutlong.

³⁴ Nnaya tlhaloganyo, ke tle ke boloke molao wa gago, ke o tlhokomele ka pelo yotlhe.

³⁵ Ntsamaise mo tseleng ya ditaelo tsa gago; gonne e a nkgatlha.

³⁶ Sekegela pelo ya me kwa ditshupong tsa gago, mme e seng kwa boikhumisong.

³⁷ Faposa matlho a me gore a se ka a leba tsa boithamako, o mphedise mo ditseleng tsa gago.

³⁸ Dirafaletsa motlhanka wa gago tsholofetso ya gago e e lebanyeng ba ba go boifang.

³⁹ Tlosa mo go nna kgobo e ke e tshabang; gonne dikatlholo tsa gago di siame.

⁴⁰ Ruri ke tlhologeletswe ditaolo tsa gago. Mphedise ka tshiamo ya gago.

⁴¹ A mapelotlhomogi a gago a ntirafalele, Morena, e bong pholoso ya gago ka fa Lefokong la gago,

⁴² gore ke tle ke fetole ene yo o nkgobang; gonne ke ikanya Lefoko la gago.

⁴³ Mme Lefoko la nnete o se ka wa le tlosetsa ruri mo molomong wa me; gonne ke lebeletse dikatlholo tsa gago.

⁴⁴ Foo ke tla nna ke tlhokomela molao wa gago ka gale le ka bosakhutleng.

⁴⁵ Ke rata go sepela fa go atlhameng; gonne ke batla ditaolo tsa gago.

⁴⁶ Ke tla bua ka ga ditshupo tsa gago fa pele ga dikgosi, ke sa tlhajwe ke ditlhong.

⁴⁷ Ke natefelwa ke ditaelo tsa gago tse ke di ratang.

⁴⁸ Ke tla tsholeletsa mabogo kwa ditaelong tsa gago tse ke di ratang, ke akanya melao ya gago.

⁴⁹ Gopola Lefoko le o le buileng le motlhanka wa gago, wa re ke se le lebale.

⁵⁰ Ke yona kgomotso ya me mo pogisegong ya me, fa tsholofetso ya gago e mphedisa.

⁵¹ Baikgogomosi ba ntshotlile thata; mme ga ke a ka ka fapoga molao wa gago.

⁵² Ke ne ka gakologelwa dikatlholo tsa gago tsa bogologolo, Morena, ka ikgomotsa.

⁵³ Ke ne ka tuka bogale ka ntlha ya baikepi ba ba tlogelang molao wa gago.

⁵⁴ Melao ya gago e mphetogetse difela mo ntlong ya me ya boeng.

⁵⁵ Ke lala ke gakologelwa leina la gago, Morena, ke tlhokomela molao wa gago.

⁵⁶ Ga nna kabelo ya me, ka ke tlhokometse ditaolo tsa gago.

⁵⁷ Morena ke kabelo ya me; ke rile, ke tla tlhokomela mafoko a gago.

⁵⁸ Ke ne ke lelela sefatlhegong sa gago ka pelo yotlhe; ntlhomogele pelo ka fa tsholofetsong ya gago.

⁵⁹ Ke akantse metsamao ya me, ka busetsa dinao tsa me kwa ditshupong tsa gago.

⁶⁰ Ka itlhaganela, ka se ka ka diega go tlhokomela ditaelo tsa gago.

⁶¹ Megala ya baikepi e ntharile; mme ga ke a ka ka lebala molao wa gago.

⁶² Ke tsoga gare ga bosigo go go galaletsa ka ntlha ya dikatlholo tse di siameng tsa gago.

⁶³ Ke monkane wa botlhe ba ba go boifang, le wa bona ba ba tlhokomelang ditaolo tsa gago.

⁶⁴ Morena, lefatshe le tletse bopelonomi jwa gago. Nthute melao ya gago.

⁶⁵ Morena, o diretse motlhanka wa gago molemo ka fa Lefokong la gago.

⁶⁶ Nthute bopelotheri le kutlwisiso le kitso, gonne ke dumela ditaelo tsa gago.

⁶⁷ E rile ke ise ke kokobediwe, ka timela; mme jaanong ke tlhokometse polelo ya gago.

⁶⁸ O molemo, o bile o dira molemo; nthute melao ya gago.

⁶⁹ Baikgogomosi ba mpharile ka maaka; mme nna ke tlhokomela ditaolo tsa gago ka pelo yotlhe.

⁷⁰ Dipelo tsa bona di nonne, ga di utlwe sepe; mme nna ke kgatlhwa ke molao wa gago.

⁷¹ Go ne go le molemo mo go nna go kokobediwa gore ke ithute melao ya gago.

⁷² Molao wa molomo wa gago, mo go nna o gaisa dikete tsa gouta le selefera.

⁷³ Diatla tsa gago di mpopile tsa mpaakanya. Ntlhalefise gore ke ithute ditaelo tsa gago.

⁷⁴ Ba ba go boifang ba a mpona, ba a itumela, ka ke lebeletse Lefoko la gago.

⁷⁵ Morena, ke a itse, fa dikatlholo tsa gago di siame, mme o nkwatlhaile ka boikanyo.

⁷⁶ Tswetswe a bopelontle jwa gago bo nkgomotse, ka fa o solofeditseng motlhanka wa gago ka teng.

⁷⁷ A mautlwelo-botlhoko a gago a mpharafare gore ke phele gonne molao wa gago ke boitumelo jwa me.

⁷⁸ A baikgogomosi ba tlhajwe ke ditlhong, ka ba ntshiamololetse ba se na lebaka; mme nna ke tla akanya ditaolo tsa gago.

⁷⁹ A bona ba ba go boifang ba boele kwa go nna, le bona ba ba itseng ditshupo tsa gago.

⁸⁰ A pelo ya me e nne mo melaong ya gago, e itekanetse, gore ke se ka ka tlhajwa ke ditlhong.

⁸¹ Mowa wa me o nyoretswe pholoso ya gago; ke lebeletse Lefoko la gago.

⁸² Matlho a me a tlhoafaletse polelo ya gago a re: “O tla nkgomotsa leng?”

⁸³ Gonne le fa ke ntse jaaka lekuka mo musing, ga ke a ka ka lebala melao ya gago.

⁸⁴ Malatsi a motlhanka wa gago a kae? Ba ba ntlhomereng o tla ba atlhola leng?

⁸⁵ Baikgantshi ba nkepetse mamena, ba ba seng ka fa molaong wa gago.

⁸⁶ Ditaelo tsotlhe tsa gago di boammaaruri. Ba mpogisa ka bomo; nthuse.

⁸⁷ Ba batlile go nnyeletsa mo lefatsheng; mme nna ga ke a ka ka tlogela ditaolo tsa gago.

⁸⁸ A o ko o mphedise ka fa bopelonoming jwa gago gore ke tlhokomele tshupo ya molomo wa gago.

⁸⁹ Morena, Lefoko la gago le eme ka tlhomamo mo legodimong ka bosakhutleng.

⁹⁰ Boikanyego jwa gago ke jwa losika longwe le longwe; o tlhomamisitse lefatshe, mme le ntse le eme.

⁹¹ Le kajeno di sa ntse di eme ka fa dithulaganyong tsa gago; gonne dilo tsotlhe di a go direla.

⁹² Fa molao wa gago e ka bo e ne e se boitumelo jwa me, foo nka bo ke latlhegile mo tlhorisegong ya me.

⁹³ Ga nkitla ke lebala ditaolo tsa gago ka gope; gonne o mphedisitse ka tsona.

⁹⁴ Ke wa gago, nthuse; gonne ke batla ditaolo tsa gago.

⁹⁵ Baikepi ba ntaletse go nnyeletsa. Ditshupo tsa gago ke a di tlhokomela.

⁹⁶ Ke bonye bokhutlo jwa tsotlhe tse di itekanetseng, mme taelo ya gago ga e na mafelelo.

⁹⁷ Molao wa gago ke o rata thata jang! Ke o akanya letsatsi lotlhe.

⁹⁸ Taelo ya gago e ntlhalefisa go gaisa baba ba me; gonne ke ya me ka bosakhutleng.

⁹⁹ Ke tlhalefile go gaisa baruti ba me botlhe; gonne ditshupo tsa gago ke tsona tse ke di akanyang.

¹⁰⁰ Ke phala bagolo ka tlhaloganyo; gonne ke tlhokometse ditaolo tsa gago.

¹⁰¹ Ke thibile dinao tsa me mo tseleng nngwe le nngwe e e bosula gore ke tlhokomele Lefoko la gago.

¹⁰² Ga ke a ka ka fapoga ditao tsa gago; gonne o nthutile.

¹⁰³ Ditsholofetso tsa gago di monate jang mo magalapeng a me; di botshe go gaisa mafura a dinotshe mo molomong wa me!

¹⁰⁴ Ke bona tlhaloganyo ka ditaolo tsa gago; ke ka ntlha ya moo ke tlhoileng tsela nngwe le nngwe ya maaka.

¹⁰⁵ Lefoko la gago ke lobone lwa dinao tsa me, le lesedi la tsela ya me.

¹⁰⁶ Ke ikanne, ka ba ka dirafatsa go tlhokomela dithulaganyo tse di siameng tsa gago.

¹⁰⁷ Ke obegile thata. Morena, mphedise ka fa Lefokong la gago.

¹⁰⁸ Morena, a o ko o natefelwe ke tse molomo wa me o di go ntshetsang ka bopelotshweu, mme o nthute tse di ntshwanetseng.

¹⁰⁹ Bophelo jwa me bo mo dipharagobeng ka gale; mme molao wa gago ona ga ke a ka ka o lebala.

¹¹⁰ Baikepi ba nthaisitse ka serai; mme ga ke a ka ka fapoga ditaolo tsa gago.

¹¹¹ Ditshupo tsa gago ke boswa jwa me ka bosakhutleng; gonne tsona ke boitumelo jwa pelo ya me.

¹¹² Pelo ya me e palelela mo go diriseng melao ya gago ka gale go ya bosakhutleng.

¹¹³ Ba ba pelo-pedi ke ba tlhoile, mme molao wa gago ona ke a o rata.

¹¹⁴ O tshireletso ya me le thebe ya me; ke lebeletse Lefoko la gago.

¹¹⁵ Tlogang fa go nna, basulafatsi ke lona, gore ke tlhokomele ditaelo tsa Modimo wa me.

¹¹⁶ Ntshegetsa ka fa tsholofetsong ya gago gore ke phele; se ntlhabise ditlhong ka ntlha ya tsholofelo ya me.

¹¹⁷ Ntshegetsa gore ke phologe, mme ke tla itumelela melao ya gago ka gale.

¹¹⁸ Botlhe ba ba fapogang melao ya gago o a ba latlha; gonne tsietso ya bona ke maaka fela.

¹¹⁹ Baikepi botlhe ba lefatshe o ba kokola jaaka manyela; ke ka moo ke ratang ditshupo tsa gago.

¹²⁰ Mmele wa me o roromisiwa ke go go tshaba; ke boifa dikatlholo tsa gago.

¹²¹ Ke dirile ka molao le tshiamo. O se ka wa ntlogelela bapatiki ba me.

¹²² Emela motlhanka wa gago gore a phele sentle; a ba ba matepe ba se nkgatelele.

¹²³ Matlho a me a eleditse pholoso ya gago le tsholofetso e e siameng ya gago.

¹²⁴ Direla motlhanka wa gago ka fa bopelonoming jwa gago, o nthute melao ya gago.

¹²⁵ Ke motlhanka wa gago; ntlhalefise gore ke lemoge ditshupo tsa gago.

¹²⁶ Ke nako ya Morena ya go itshupa ka tiro; ba robagantse molao wa gago.

¹²⁷ Ke ka ntlha ya moo ke ratang ditaelo tsa gago go feta gouta le gouta e e sa pekwang.

¹²⁸ Ke ka ntlha ya moo ke kayang ditaolo tsotlhe tsa gago tshiamo; mme ke tlhoile tsela nngwe le nngwe ya maaka.

¹²⁹ Ditshupo tsa gago di a gakgamatsa; ke ka ntlha ya moo, fa mowa wa me o di boloka.

¹³⁰ Tlhaloso ya mafoko a gago e a sedimosa, e tlhalefisa ba ba se nang kitso.

¹³¹ Ke kopolola molomo, ke kgalegile; gonne ke tlhologeletswe ditaelo tsa gago.

¹³² Retologela kwa go nna, o ntlhomogele pelo jaaka go tshwanetse ba ba ratang leina la gago.

¹³³ Tiisa dikgato tsa me, ke tle ke sepele ka fa Lefokong la gago; mme a ke se laolwe ke boikepo bope.

¹³⁴ Nkgolole mo patikong ya batho, ke tle ke ele ditaolo tsa gago tlhoko.

¹³⁵ Phatsimisetsa motlhanka wa gago sefatlhego sa gago, o nthute melao ya gago.

¹³⁶ Matlho a me a ela dinokana tsa metsi, ka ba sa dirise molao wa gago.

¹³⁷ O tshiamo, Morena, le dikatlholo tsa gago ke tsa nnete.

¹³⁸ O laetse ditshupo tsa gago ka tshiamo le ka boikanyego jo bogolo.

¹³⁹ Ke jelwe ke tlhoafalo ya me, ka baganetsi ba me ba lebetse mafoko a gago.

¹⁴⁰ Lefoko la gago le itshekile thata; mme motlhanka wa gago o a le rata.

¹⁴¹ Ke monnye, ke bile ke a nyatsega; mme ditaolo tsa gago ga ke di lebale.

¹⁴² Tshiamo ya gago ke tshiamo e e sa khutleng, molao wa gago ke boammaaruri.

¹⁴³ Tlalelo le pitlaganyo di nkwetse, mme ditaelo tsa gago di njesa monate.

¹⁴⁴ Ditshupo tsa gago ke tsa tshiamo ka bosakhutleng. Ntlhalefise gore ke phele.

¹⁴⁵ Ke rapetse ka pelo yotlhe ka re: Nkutlwe, Morena; ke tla tlhokomela melao ya gago.

¹⁴⁶ Ke goetse go wena ka re: Nthusa mme ke tla ela ditshupo tsa gago tlhoko.

¹⁴⁷ Ke rakile mahube a moso, ka goela thuso; ke lebeletse mafoko a gago.

¹⁴⁸ Matlho a me a rakile nako ya ditiso tsa bosigo gore ke akanye polelo ya gago.

¹⁴⁹ Utlwa lentswe la me ka fa bopelonoming jwa gago; Morena, mphedise ka fa tshiamisong ya gago.

¹⁵⁰ Ba ba ntlhomereng ka bolotsana ba atametse, bona ba ba kgakala le molao wa gago.

¹⁵¹ Wena, Morena, o gaufi, ditaelo tsa gago tsotlhe ke tsa boammaaruri.

¹⁵² Ga ke bolo go itse ka ditshupo tsa gago gore o di tlhomamiseditse go ya bosakhutleng.

¹⁵³ Leba tlhorisego ya me, o nthuse; gonne ga ke lebale molao wa gago.

¹⁵⁴ Nkemele mo tshekong ya me, o nkgolole, o mphedise ka fa tsholofetsong ya gago.

¹⁵⁵ Pholoso e kgakala le baikepi; gonne ga ba batle melao ya gago.

¹⁵⁶ Morena, mautlwelo-botlhoko a gago a magolo. Mphedise ka fa ditshiamisong tsa gago.

¹⁵⁷ Ba ba ntlhomereng le baganetsi ba me ba bantsi; le fa go ntse jalo ga ke fapoge ditshupo tsa gago.

¹⁵⁸ E a re fa ke bona ba ba sa ikanyegeng, ba ntene, ka ba sa tlhokomele polelo ya gago.

¹⁵⁹ Bona, ke rata ditaolo tsa gago; Morena, o mphedise ka fa bopelonoming jwa gago.

¹⁶⁰ Kakaretso ya Lefoko la gago ke boammaaruri; dithulaganyo tsotlhe tse di siameng tsa gago ke tse di sa khutleng.

¹⁶¹ Babusi ba ntlhomere ka bomo, mme pelo ya me e boifa mafoko a gago fela.

¹⁶² Ke itumelela polelo ya gago jaaka mongwe yo o bonang thopo e kgolo.

¹⁶³ Maaka ke a tlhoile, ke a a sisimoga; mme molao wa gago ke a o rata.

¹⁶⁴ Ke go baka gasupa ka letsatsi ka ntlha ya ditshiamiso tse di siameng tsa gago.

¹⁶⁵ Ba ba ratang molao wa gago ba na le kagiso e kgolo; ga ba na se se ba kgopisang.

¹⁶⁶ Ke solofetse pholoso ya gago, Morena, ke dirile ka fa ditaelong tsa gago.

¹⁶⁷ Mowa wa me o tlhokometse ditshupo tsa gago, mme ke di rata thata.

¹⁶⁸ Ke tlhokometse ditaolo tsa gago le ditshupo tsa gago; gonne ditsela tsa me tsotlhe di fa pele ga gago.

¹⁶⁹ Morena, a selelo sa me se atamele fa pele ga gago; ntlhalefise ka fa Lefokong la gago.

¹⁷⁰ A mekokotlelo ya me e fitlhe fa pele ga gago; mpholose ka fa polelong ya gago.

¹⁷¹ Molomo wa me o tla opela ka ga Lefoko la gago; gonne ditaelo tsa gago tsotlhe di siame.

¹⁷² Loleme lwa me lo tla opela ka ga Lefoko la gago; gonne ditaelo tsa gago tsotlhe di siame.

¹⁷³ A letsogo la gago le nthuse; gonne ke itlhaoletse ditaolo tsa gago.

¹⁷⁴ Morena, ke tlhologeletswe pholoso ya gago; molao wa gago o njesa monate.

¹⁷⁵ A mowa wa me o phele gore o go bake, mme a ditshiamiso tsa gago di nthuse.

¹⁷⁶ Ke latlhegile jaaka nku e e timetseng; a o ko o batle motlhanka wa gago; gonne ditaelo tsa gago ga ke di lebale.