Lipesalema 118 - Setswana 1970

Sefela sa tebogo sa go opelwa ke bontsi mo moletlong

¹ Lebogang Morena, gonne o molemo; gonne bopelotlhomogi jwa gagwe ke jo bo sa khutleng.

² A Iseraele a bue a re: “Ee, bopelotlhomogi jwa gagwe ke jo bo sa khutleng.”

³ A boora Arone ba bue ba re: “Ee, bopelotlhomogi jwa gagwe ke jo bo sa khutleng.”

⁴ A ba ba boifang Morena ba bue ba re: “Ee, bopelotlhomogi jwa gagwe ke jo bo sa khutleng.”

⁵ Ke ne ka bitsa Morena ke le mo pitlaganong; Morena a nkaraba, a mpaya mo go atlhameng.

⁶ Morena o ntlheng ya me, ga nkitla ke boifa; kana motho a ka ntirang?

⁷ Morena o ntlheng ya me, ke mothusi wa me; mme nna ba ba ntlhoileng ke tla ba tlhaetsa matlho.

⁸ Go nna mo tshireletsong ya Morena go gaisa go ikanya batho.

⁹ Go nna mo tshireletsong ya Morena go gaisa go ikanya batlotlegi.

¹⁰ Baheitane botlhe ba ne ba ntsentse gare; mme ke ba remagantse ka leina la Morena.

¹¹ Ba ne ba mpotile ntlheng tsotlhe; ee, ba ntikanyeditse; mme ke ba remagantse ka leina la Morena.

¹² Ba ne ba ntikanyeditse jaaka dintsi tsa dinotshe, ba tuka jaaka molelo wa mitlwa; mme ke ba remagantse ka leina la Morena.

¹³ Ke ne ka kgaramediwa thata gore ke we, mme Morena a nthusa.

¹⁴ Morena ke thata ya me le sefela sa me sa pako, o diregile pholoso ya me.

¹⁵ Lentswe la tuduetso le la pholoso le mo matlong a basiami. “Letsogo la Morena le le jang le dira ditiro tsa bonatla.

¹⁶ Letsogo la Morena le le jang le a godisa; letsogo la Morena le le jang le dira ditiro tsa bonatla.”

¹⁷ Ga ke ne ke swa, mme ke tla phela, ke bolela ditiro tsa Morena.

¹⁸ Morena o nkwatlhaile segolo, mme ga a ka a nneela mo losong.

¹⁹ Mpuleleng dikgoro tsa tshiamo, ke tle ke tsene ka tsona, ke leboge Morena.

²⁰ Kgoro ya Morena ke e; basiami ba tla tsena ka yona.

²¹ Ke tla go leboga, ka gonne o nkutlwile, wa nna pholoso ya me.

²² Lentswe le le latlhilweng ke baagi le diregile letlapa la sekhutlo.

²³ Se ke se se dirilweng ke Morena; mme ke kgakgamatso mo matlhong a rona.

²⁴ Letsatsi le, ke le le dirilweng ke Morena; a re ipeleng, re itumele ka lone.

²⁵ Ao Morena, a ko o thuse! Ao Morena, a ko o tsweletse pele!

²⁶ A go bakwe yo o tlang ka leina la Morena; re lo tshegofatsa, re le mo Ntlong ya Morena.

²⁷ Morena ke Modimo, mme o re neile lesedi. Bofang seruiwa sa tlhabelo ya moletlo ka dikgole gore se fitlhe fa dinakeng tsa aletare.

²⁸ O Modimo wa me, ke tla go baka; o Modimo wa me, ke tla go godisa.

²⁹ Lebogang Morena, gonne o molemo; le bopelotlhomogi jwa gagwe ke jo bo sa khutleng.