Lipesalema 116 - Setswana 1970

Sefela sa go lebogela kgololo

¹ Morena ke a mo rata, gonne o utlwile lentswe la me la mekokotlelo ya me.

² E re ka a ntshekegetse tsebe, ke tla nna ke mmitsa ka malatsi otlhe a me.

³ Dikgole tsa loso di ne di ntikanyeditse, le ditlalelo tsa felo ga baswi di ne di ntshwere, ka fitlhela pitlagano le bohutsana.

⁴ Mme ke ne ka bitsa leina la Morena ka re: “Ao, Morena, swatola botshelo jwa me!”

⁵ Morena o boitshwarelo le tshiamo, Modimo wa rona o boutlwelo-botlhoko.

⁶ Morena o boloka ba ba pelo di se nang maano. Ke ne ke koafetse, mme a nthusa.

⁷ Mowa wa me, boela kwa boikhutsong jwa gago; gonne Morena o go diretse molemo.

⁸ Ee, o nkgolotse mo losong le matlho a me mo dikeleding le dinao tsa me mo go kgotšweng.

⁹ Ke tla tsamaya fa pele ga sefatlhego sa Morena mo lefatsheng la baphedi.

¹⁰ Ke ne ke ntse ke dumela mo Modimong, le fa ke ne ke re: “Ke obegile thata.”

¹¹ Ka bua ke tshogile ka re: “Batho botlhe ke baaki.”

¹² Nka lebogela Morena ka eng ditiro tsotlhe tse di molemo tse a di ntiretseng?

¹³ Ke tla tsholetsa senwelo sa phologo, ke bitsa leina la Morena.

¹⁴ Maikano a me ke tla a dirafaletsa Morena, ee, fa pele ga morafe otlhe wa gagwe.

¹⁵ Loso lwa baratwa ba Morena ke selo sa botlhokwa mo matlhong a gagwe.

¹⁶ Ao, Morena, kana ke motlhanka wa gago; ke motlhanka wa gago, morwa lelata la gago; o funolotse dikgole tsa me.

¹⁷ Ke tla go tsisetsa setlhabelo sa tebogo, ke bitsa leina la Morena.

¹⁸ Maikano a me ke tla a dirafaletsa Morena, ee, fa pele ga morafe otlhe wa gagwe,

¹⁹ mo malapeng a Ntlo ya Morena, mo teng ga gago, Jerusalema. Haleluya!