Lipesalema 115 - Setswana 1970

Kgalalelo ya Modimo wa nnete, le bosengsepe wa medimo ya diseto

¹ Se nee rona, Morena, se nee rona, mme o nee leina la gago kgalalelo ka ntlha ya bopelotlhomogi jwa gago le ka ntlha ya boammaaruri jwa gago.

² Baditšhaba ba tla buelang ba re: “Kana Modimo wa bona o kae?”

³ Athe Modimo wa rona o mo legodimong, o dira tsotlhe tse o ratang go di dira.

⁴ Medimo ya bona ya diseto ke selefera le gouta, ke tiro ya diatla tsa batho.

⁵ E na le melomo, mme ga e bue; e na le matlho, mme ga e bone;

⁶ e na le ditsebe, mme ga e utlwe; e na le dinko, mme ga e dupe;

⁷ e na le diatla, mme ga e tshware; e na le dinao, mme ga e tsamae; le gona ga e ntshe mosumo ope ka memetso ya yona.

⁸ Badiri ba yona ba tla nna fela jaaka yona, le mongwe le mongwe yo o e ikantseng.

⁹ A Baiseraele ba ikanye Morena; ke ena thuso le thebe ya bona.

¹⁰ A ba ntlo ya ga Arone ba ikanye Morena; ke ena thuso le thebe ya bona.

¹¹ A ba ba boifang Morena ba ikanye Morena; ke ena thuso le thebe ya bona.

¹² Morena o re gopotse, o tla tshegofatsa; o tla tshegofatsa Baiseraele, a tshegofatsa ba lapa la ga Arone.

¹³ O tla tshegofatsa ba ba boifang Morena, bannye le bagolo.

¹⁴ Morena o tla lo atisa, lona le bana ba lona.

¹⁵ Lo tshegofaditswe ke Morena yo o dirileng legodimo le lefatshe.

¹⁶ Legodimo ke legodimo la Morena, mme lefatshe lone o le neile bana ba batho.

¹⁷ Baswi ga ba boke Morena, le e seng ope wa bona ba ba fologelang kwa tidimalong,

¹⁸ mme rona re baka Morena jaanong le ka bosakhutleng. Haleluya!