Lipesalema 112 - Setswana 1970

Lesego la yo o boifang Morena

¹ Haleluya! Go sego monna yo o boifang Morena, yo ditaolo tsa gagwe di mo kgatlhang segolo.

² Kokomana ya gagwe e tla nna le thata e kgolo mo lefatsheng; losika lwa ba ba nang le nnete lo tla tshegofala.

³ Letlotlo le khumo di mo ntlong ya gagwe, tshiamo ya gagwe e nnela ruri.

⁴ Mosiami o bonegela ba ba nang le nnete mo lefifing jaaka lesedi, a le boitshwarelo le boutlwelo-botlhoko le tshiamo.

⁵ Go sego monna yo o kutlwelo-botlhoko, a adimana; yo o dirang tsa gagwe ka tshiamo.

⁶ Gonne ga a nke a theekela ka gope; mosiami o tla nna a gopolwa ka gale.

⁷ Ga a nke a boifisiwa ke polelo e e bosula; o iteile pelo ka lentswe ka go ikanya Morena.

⁸ Pelo ya gagwe e tlhomame, ga a nke a boifa sepe go ya a be a lebe baba ba gagwe ka kgatlhego.

⁹ O gasagasetsa, batlhoki a ba fe. Tshiamo ya gagwe e nnetse ruri; lonaka lwa gagwe lo godisiwa ka tlotlo.

¹⁰ Fa moikepi a bona jalo, o a ngala, a phuranye meno, a swabe. Keletso ya moikepi e a nyelela.