Lipesalema 111 - Setswana 1970

Poko ya ditiro tsa Morena

¹ Haleluya! Ke tla leboga Morena ka pelo yotlhe mo lekgotleng la ba ba nang le nnete le mo phuthegong ke re:

² Ditiro tsa Morena ke tse dikgolo, di tlhotlhomisiwa ke botlhe ba ba kgatlhwang ke tsona.

³ Tiro ya gagwe ke borena le kgalalelo, tshiamo ya gagwe e emetse ruri.

⁴ O dirile segopotso sa dikgakgamatso tsa gagwe. Morena o boitshwarelo le boutlwelo-botlhoko.

⁵ Ba ba mmoifang o ba file dijo, kgolagano ya gagwe o e gopola ka bosakhutleng.

⁶ Thata ya ditiro tsa gagwe o e itsisitse batho ba gagwe ka go ba ruisa boswa jwa Baditšhaba.

⁷ Ditiro tsa diatla tsa gagwe di boammaaruri le tshiamo, ditaelo tsa gagwe di ikanyega tsotlhe;

⁸ di tlhomamiseditswe ruri le ka bosakhutleng, di tlhokomelwa ka boikanyo le ka nnete.

⁹ Batho ba gagwe o ba rometse kgololo; o laetse kgolagano ya gagwe go nna e e sa khutleng; leina la gagwe le boitshepo, le a tshabega.

¹⁰ Go boifa Morena ke tshimologo ya botlhale; mongwe le mongwe yo o dirang jalo o na le tlhaloganyo e e molemo. Poko ya gagwe e nnetse ruri.