Lipesalema 110 - Setswana 1970

Kgosi e e leng moperesiti

¹ Pesalome ya ga Dafita. Morena o ne a raya Morena wa me a re: “Dula fa letsogong la me le le jang go ya ke be ke dire baba ba gago sebeo sa dinao tsa gago.”

² Thobane-ya-bogosi ya thata ya gago, Morena o tla e otlolola a le mo go Sione a re: “Busa mo gare ga baba ba gago.”

³ Ka letsatsi la pololo ya gago batho ba gago ba tla tla ka bopelotshweu, ba apere mekgabo ya boitshepo. Mophato wa makau o tla tla kwa go wena, jaaka monyo o tsalwa ke mahube.

⁴ Morena o ikanne – mme ga a kitla a dirolola ikano – a re: “O Moperesiti ka bosakhutleng ka fa mokgweng wa ga Melegi-Seteke.”

⁵ Morena yo o fa letsogong le le jang la gago o tla thubakanya dikgosi ka letsatsi la bogale jwa gagwe.

⁶ O tla atlhola mo ditšhabeng, go tlala direpa, a thubakanya tlhogo e e okameng lefatshe le legolo.

⁷ O tla nwa mo nokaneng, a le mo tseleng, mme ka ntlha ya moo o tla tsholetsa tlhogo.